Pag-ulikid sa IKAAYONG LAWAS

October 23, 2009

Nakaagum ang 23,172 ka kubos nga pumoluyo sang libre nga “PhilHealth card,” programa sa ikaayong lawas sang gobierno probinsyal sa pagpamuno ni Gov. Victor A. Tanco para sa benipisyo sang tawo.

 

Ang nasambit nga programa ang kabahin sang “5-point Development Agenda—Healthy Capizeños” ni Governor Tanco, sa diin guinpakamaayo sang Gobernador nga mangin propesyonal ang nasambit nga programa sa pagdumala sang talatapan sang Provincial Legal Office sa pagpamuno ni Atty. Jose Villanueva.

 

Suno kay Gov. Tanco,“ nagapati ako, ang mapagros nga tawo mangin produktibo sa komunidad.”

 

“Ang ikaayong lawas isa ka manggad nga dapat naton hatagan sang pag-ulikid kasubong sang pagpalangga sa aton pamilya,” dugang pa nga pahayag sang Gobernador.

 

Ang mga kubos nga pumoluyo sang kabanwahanan sa nahauna nga distrito sang probinsya nga nakabaton sang libre nga PhilHealth (Philippine Health, Insurance Inc.) card amo ang Maayon (1,449 ka resipyenti), Panay (887), Panitan (916), Pilar (1,525), Pontevedra (1,328), President Roxas (1,311) kag Roxas City (1,412).

 

Samtang sa ikaduha nga distrito sang Capiz amo ang Cuartero (829), Dao (1,537), Dumalag (892), Dumarao (1,962), Ivisan (1,101), Jamindan (1,150), Mambusao (2,267), Sapian (1,017), Sigma (1,546) kag Tapaz (2,043).

 

Naglab-ot na sa 17,744 ka kubos nga pumoluyo ang naka-benipisyo sang PhilHealth card sa probinsya sang Capiz kag ang distribusyon nagsugod pa sang Mayo 2009.

 

“Ini nga programa makabulig gid sa mga kasimanwa naton nga na-ospital,” pagkabalaka ni Gov. Tanco.

 

Sang damlag lang, nakabaton sang “plaque of recognition” si Governor Tanco sa guinpatigayon nga 6^th General Assembly and PhilHealth Governors Forum sadtong Hunyo 11 sa Metro Manila.

 

Guinkilala sang PhilHealth ang Gobernador sang Capiz matapos nga iya guinpanikasugan ang mga kubos nga pumoluyo nga mangin kabahin sang national Health Insurance Program (NHIP) kag mahatagan sang libre nga PhilHealth cards.

 

Guinpalab-ot man ni Dr. Rey B. Aquino, presidente kag chief executive officer sang PhilHealth ang iya pagpanginbulahan kay Gov. Victor A. Tanco matapos ang Capiz malakip sa mga probinsya sa pungsod nga guindeklarar bilang “Universally Covered” sang nasambit nga Health Insurance.

 

“Ang ini nga pagkilala kay Governor Tanco, nagapakita lamang nga ang ikaayong lawas amo ang prayoridad nga programa sang lokal nga panguluhan sang sini nga probinsya,” suno kay Dr. Aquino.

 

Guinbisita man ni Dr. Aquino ang mga PHilHealth Provincial Offices sa Pilipinas kalakip na ang Capiz agud labi nga mapasangkad ang paghatag sang serbisyo sa pumoluyo.

 

Kaangot sini, padayon ang serbisyo medikal sang gobierno probinsyal sa idalom sang administrasyon ni Gov. Tanco sa kabarangayan agud mahatagan sang igtalupangod ang ikaayong lawas sang pumoluyo.

 

Samtang ang iban nga probinsya ang nagapatigayon sang ila “lakbay aral” sa Capiz agud magtu-on sang pila ka programa sang lokal nga gobierno tuhoy sa ikaayong lawas, kasubong sang probinsya sang Romblon, Agusan del Sur, Cordillera, Nueva Vizcaya, Romblon kag iban pa