Libro ni Jovita Fuentes guinlunsar sa Capiz

Suportado ni Gov. Victor A. Tanco ang paglunsar sa libro sang “Capizeña artist” nga si Jovita Fuentes  nga may tigulo “The Passion of Jovita Fuentes” sadtong Septyembre 13 sa Hall of Governors sang Kapitolyo Probinsyal.

                Ang nasambit nga libro sang guinakabig nga “operatic singer, Filipino Diva kag iban pa nga pagkilala kay Jovita Fuentes,” ang guinsulat sang lagting nga si Peter Solis Nery agud labi nga malaragway ang kabuhi sang Capizeña nga halos nagdominar sang bug-os nga kalibutan ilabi na gid sa Europa bangud sa iya bulawanon nga tingog nga nagbihag sang palamatin-an sang tawo.

                Suno kay Gov. Tanco, “nagakadapat lamang nga hatagan sang pagkilala ang isa ka Capiznon kasubong ni Jovita Fuentes nga naghatag sang kadungganan sa probinsya sang Capiz sa patag sang musika.”

                Si Jovita ang anak sang magti-ayon nga sanday Don Canuto Fuentes kag Doña Dolores Fuentes sadtong Pebrero 15, 1895 sa Capiz (karon Roxas City) Capiz.

                Suno sa masaligan nga tiliman-an nagsugod ang pagkilala kay Jovita bilang manug-amba sang sia magpadulong sa luas sang pungsod sadtong Pebrero 1942 sa diin nagtuon sia sang kurso sa “voice culture” kag nangin maestra.

                Apang ang kahigayunan nag-abot agud labi nga makilala ang iya kinaadman sa pag-amba sa diin guinpabati ang iya tumalagsahon nga tingog sa Pia Cenza Opera House sa diin nagbihag sang nilibo ka Italyano.

                Matapos ang madinalag-on nga konsyerto sa entablado, guinsundan ang iya pagpasundayag sa mga pungsod sang Czechoslovakia, Poland, Austria, Hungary, Denmark kag iban pa nga pungsod.”

                Guinpasikat ni Jovita Fuentes ang mga ambahanon kasubong sang “Nasaan ka irog, Ang Mutya ng Pasig, Ikaw pa rin, Ay kalisud kag iban pa.”

                Ang “Ay kalisud,” ang guinkanta ni Jovita sa sala sang Philippine Congress sa katapusan nga adlaw sang espesyal nga sesyon sadtong 1956, sa diin isa ka hagna ang nagakilala kag napasad sa “Operatic Singer” bilang Filipino Artist.

                Ang nasambit nga okasyon ang guintambungan sang mga pamilya ni Jovita Fuentes kag Jose Neri “Bubbles” Ong, presidente sang Capiz Visitors and Convention Bureau (CVCB); Jorgen Gregorio, president sang Capiz Historical Institute (CHI) kaupod ang mga katapo sini, kalakip na ang mga katapo sang “tri-media” sa probinsya sang Capiz.

                Daku ang pagpasalamat ni Peter Solis Nery kay Governor Tanco sa guinhatag nga suporta sa paglunsar sang nasambit nga libro. (Capiz Prov’l Press Bureau)