IMPORMASYON

Sadtong panahon sang Martial Law, diutay guid lang ang pamantalaan nga nahatagan sang permiso nga mabalhag, gani nangin limitado ang impormasyon.

                Diri sa Capiz, may mga proyekto kag programa sadto ang gobierno probinsyal nga dapat mahibaluan sang pumoluyo.

                Ini  ang kabangdanan nga si anay Gov. Cornelio Villareal, Jr. ang nagpabalhag sadtong Agosto 1974 sang bulanan nga pamantalaan sa Hiligaynon nga lingguahe kag guinhingadlan sang “Kabalaka Capiznon,” nga guinpanagtag sang libre sa mga kabarangayan sang probinsya.

                Guinbantala sa sini nga pamantalaan ang mga mapuslanon nga impormasyon kag mga balita nahanungod sa Capiz … nagabantala sang mga hinimuan sang pangulohan kag subong man ang istorya sang puod sang Capiz.

                Ang “Kabalaka Capiznon” nauntat pagkatapos sang lima (5) ka tuig nga paghatag sang nahinambitan nga impormasyon sa pumoluyo.

                Apang sang pagpungko ni Gov. Victor A. Tanco bilang ika-20 nga gobernador sang probinsya sang Capiz sang tuig 2007, liwat nga nahisayran sang pumoluyo ang mga programa kag hilikuton nga guinhimo kag pagahimuon sang gobernador paagi sa pagpabalhag niya sang opisyal nga pamantalaan sang gobierno probinsyal sa Hiligaynon nga lingguahe kag guinkilala nga PAG-ULIKID.

                Sa bulanan sini nga isyu nga guinapanagtag man sang libre sa mga barangay sa probinsya sang Capiz kag syudad sang Roxas, napalab-ot sa pumoluyo ang impormasyon nga nahatagan sang katumanan ang lima ka punto nga adyenda ni Governor Tanco sa tayuyon nga kauswagan sang probinsya kasubong sang “pagpasanyog sang ekonomiya, ikaayong lawas para sa mga Capizeño, pag-amlig sa kultura nga mangin sentro sang turismo, dekalidad kag nagakasanto nga edukasyon kag ang nagakabagay nga sistema sa inprastraktura.”

                Sa kabug-osan, nahisayran guid sang pumoluyo ang katumanan sa iya krusada nga “Pag-ulikid: Labi sa tanan ang Tawo” nga ila na nabatyagan.

                Dugang pa, ang impormasyon nga guinapatungod sang sini nga pamantalaan nagaserbi nga tulay sa tunga sang mga banwahanon kag sang pangulohan; nag-angot sang anuman nga antad nga nagapatunga sa paghangpanay kag paghi-angtanay sang pumoluyo.

                Napalab-ot man sa igtalupangod sang mga bumalasa  nga sa administrasyon ni Gov. Victor A. Tanco, napasanyog ang maduagon nga kultura sang Capiz sa mga natigayon nga mga hilikuton tuhoy sini nga naghimo sa Capiz nga nangin tagbalay sang pungsodnon nga mga kahiwatan kaangay sang “Global Peace Festival” kag ang “Dungog: Indigenous Peoples Festival,” sa diin madamo ang nagpadulong diri gikan sa iban nga lugar sang pungsod.

                Sa sini man nga pamantalaan, napasangkad sa mga bumalasa ang ihibalo tuhoy sa maragtas sang Capiz kag duna sini nga kultura nga padayon ko guinatukib kag guinasulat sa lokal nga lingguahe sa mahapos nga paghangop.

                Indi ini matapos ang amon krusada sa pagpahibalo sa pumoluyo, samtang may isa ka tawo kasubong ni Governor Tanco nga naga-ulikid sa inyo.