Capiz padayon ang kampanya kontra Dengue

Padayon ang kampanya sang gobierno probinsyal sang Capiz batuk sa pagtapna sang sakit nga “hemorrhagic fever” ukon mas kilala sa “dengue fever” matapos ang pagtuon gikan sa Capiz Epidemiological Surveillance and Response Unit (CESRU) sang Provincial Health Office.

Suno kay Provincial Health Officer II Dr. Jarvis Punsalan, hepe sang PHO, nagtaas ang kaso sang nasambit nga sakit bangud tiempo sang tingulan.

Dugang pa niya, ang pinakamadamu nga positibo sa kaso sang nasambit nga sakit ang nagikan sa dakbanwa sang Roxas nga may 55, Panay nga may 11, Mambusao nga may anum kag Dumalag nga may 4 ka kaso samtang guinasulat ang ini nga balita.

Guinpanugyan ni Dr. Punsalan kaupod ang PHO kag gobierno probinsyal sang Capiz nga kinahanglan nga mangin malimpyo sa kaugalingon, panimalay kag sa palibot para malikawan ang makamamatay nga sakit. (CPPB/Mariella Sibugan)

Capiz jins nakasipa 9 ka bulawan

Nakaangkon ang probinsya sang Capiz sang siyam ka bulawan kag 5 ka saway nga medalya sa guinpatigayon nga 2009 national taekwondo Championship nga guinhiwat sa Rizal Memorial Coliseum, Vito Cruz, Manila sadtong Agosto 1tubtob 2, 2009.

            Ang taekwondo team sang Capiz ang guin-tiglawas sang Capiz Taekwondo ukon CATA Eagles sa diin nagkampeon ang hubon sang Capiz sa babaye sa“Grade School Division” kag Junior Division sa lalaki.

            Samtang nagpangatlo naman ang Capiz sa Grade School Division sa lalaki.

            Daku naman ang pagpasalamat sang mga guinikanan sang mga bata, trainors kag sang coaches nga sanday Adorcio Venancio kag joven Venancio kay Gov. Victor A. Tanco sa iya padayon nga suporta sa isports labi nag id sa taekwondo.

capiz provincial press bureau

Capiz ikatatlo sa bugas sa WV

Guinkumpirma sang talatapan sang Bureau of Agricultural Statistics (BAS) diri sa syudad sang Roxas nga ang probinsya sang Capiz ikatatlo nga naga-prodyuser sang bugas sa Western Visayas kag ika-napulog lima sa bilog nga pungsod suno sa guinpatigayon nga regular quarterly survey sang nasambit nga talatapan.

            Suno sa pahayag ni Eric Piansay, Provincial Agricultural Statistics Officer diri sa probinsya sang Capiz, masami nga nagapanguna ang Capiz nga may sobra sa produksyon sang humay kag ang aton probinsya ang naga “supply” sang bugas sa probinsya sang Negros kag Iloilo kon ang duha ka nasambit nga probinsya ang makaangkon sang kakulangan sa “supply” sang bugas.

            “Kilala ang Capiz bilang ‘rice producing province’ tungod ang pagpananum sang humay ang isa sa nagapanguna nga kontribusyon sa aton ekonomiya,” dugang nga pahayag ni Piansay.

            Ang gobierno probinsyal sang Capiz sa idalum sang administrasyon ni Governor Tanco ang padayon nga naga-suporta sa agrikultura kasubong sang pagtugyan sang “farm tractor, rice thresher kag iban pa nga mga farm implements sa kabanwahanan kag kabaranggayan.” (CPPB/Mariella Sibugan)

capiz provincial press bureau

Capiz guinkilala sang BIR ‘Top Witholding Agent’

                Guinkilala sang Bureau of Internal Revenue (BIR) bilang “2008 Top Witholding Agent” ang gobierno probinsyal sang Capiz sa idalom sang administrasyon ni Gov. Victor A. Tanco nga guinpatigayon sadtong Agosto 10, sining tuig sa Iloilo Grand Hotel sa syudad sang Iloilo.

            Guinbaton ni Provincial Administrator Zoe G. Herrera Jr. ang “plaque” sang pagkilala sa tampad nga pagbayad sang buwis kag kontribusyon sa implementasyon sang nagkasari-sari nga proyekto paagi sa pagsunod sa kasoguan sang buwis.

            “Ang pagkilala sang BIR sa gobierno probinsyal sang Capiz sa mga hinimuan sini sa komunidad ang magahatag sang inspirasyon agud labi nga mapasangkad ang serbisyo sa tawo,” suno kay Herrera. (CPPB/Jonathan Palomar)

capiz provincial press bureau

Brgy. San Roque nakaagum serbisyo medikal; Rehabilitasyon sang eskwelahan guin-ulikid

Daku ang pagpasalamat sang pumoluyo sang barangay San Roque, Tapaz, Capiz sa personal nga pagpadulong ni Gov. Victor A. Tanco kag pagpatigayon sang gobierno probinsyal sang serbisyo medikal sadtong Agosto 24, 2009.

Kapin sa 200 ka tawo ang nakabenipisyo sang libre nga konsultasyon kag mga bulong sa ikaayong lawas sa pagbinuligay sang gobierno probinsyal kag Tapaz District Hospital suno kay Brgy. Captain Rafael Perez sang nasambit nga lugar.

Suno kay Gov. Tanco, “kinahanglan nga ang mga opisyales sang barangay, banwa kag probinsya, magbinuligay agud mapatuman ang programa sa tawo.”

Samtang sa pihak nga bahin, guinpahayag ni Erlmos Gabayaran, principal sang San Roque Elementary School, Tapaz, Capiz nga daku ang iya kalipay kaupod ang mga manunudlo sa pag-ulikid sang Gobernador paagi sa posibli nga paghatag sang pondo sa rehabilitasyon sang amon eskwelahan. (CPPB/Froilan Unarce)

Capiz Provincial Press Bureau

Brgy. Agcococ benipisaryo sang makinaryas sa panguma

Guinpangunahan ni Gov. Victor A. Tanco ang pagtugyan sang mga kagamitan sa pagpanguma para sa pumoluyo sang brgy. Agcococ, Tapaz, Capiz  sa diin guintugyan ang nasambit nga kagamitan sadtong Agosto 18, 2009 sa Tapaz Civic Center.

Ang kagamitan nga nabaton ang guinabug-osan sang isa ka unit sang kuliglig kag isa ka unit sang rice thresher kalakip ang rice blower sa guintingub nga proyekto sang gobierno probinsyal sang Capiz kag National Commission for Indigenous People (NCIP) agud mangin masulhay ang pagpanguma sang pumoluyo sang brgy. Agcococ nga ang kadamuan sang populasyon ang kabahin sang Panay Bukidnon sang Tapaz.

Dugang diri, naghatag pa gid sang 15 ka sako sang bugas si Gov. Tanco agud mabuligan ang mga kubos nga pamilya nga naglab-ot sa 195 ka benipisaryo sa banwa sang Tapaz.

Kaupod ni Governor Tanco nga nagtambong sa nasambit nga kahiwatan sanday Atty. Noel Felonco-Commissioner sang NCIP in the rest of the Visayas; Dr. Alfonso Catolin, CESO II –NCIP Regional Director Region 6 and 7; Mr. Jornelito Española - OIC-CDO III NCIP Capiz-Iloilo, kag ang mga katapo sang 47^th Infantry Battalion, 3^rd Infantry Division Philippine Army nga guinapamunuan ni Maj. Evan Bermudo. (CPPB/Jonathan Palomar)

Capiz Provincial Press Bureau

15th Farm Family Achievement Day guinsaulog

Guinpanginbulahan ni Gov. Victor A. Tanco ang masobra sa 500 ka mangunguma nga nagsaulog sang ika-15 ka tuig nga “Farm Family Achievement Day” nga guinpatigayon sa Dadivas Civic Center sa banwa sang Panitan sang damlag lang.

Ang ika-15 ka tuig nga pagsaulog sang nasambit nga hilikuton ang may tema nga “Makabagong Teknolohiya tungo maunlad na Agrikultura,” sa diin mahanas sa panibag-o nga sistema sang pagtanum sang bag-o nga binhi sang humay kasubong man sa prutas kag utanon.

Sa mensahe ni Governor Tanco, iya guinkilala ang daku nga kontribusyon sang mangunguma sa aton ekonomiya.

Ang mga mangunguma nga nagtambong sa nasambit nga okasyon ang nagikan sa 26 ka barangay sang Panitan kag guinpasundayag sang ila mga produkto nga prutas, utanon kag mga kasapatan kalakip ang ila mga nagapanguna nga palangabuhianan.

Kaupod ni Gov. Tanco nga nagtambong amo sanday Panitan Mayor Katherine Belo, Vice Mayor Generoso Derramas, mga katapo sang Sangguniang Bayan kag mga opisyal sang kabaranggayan. Kalakip man sa nagtambong sanday Provincial Agriculturist Sylvia de la Cruz kag Regional Director Larry Nacionales sang Department of Agriculture Region VI. (CPPB/Jonathan Palomar)

10 Day Care Center sa Dumarao guinpasangkad

Lima ka barangay sa banwa sang Dumarao ang naka-agum sang dugang nga mga pasilidad sa Day Care Center sadtong Agosto 21, 2009.

Ang nasambit nga pasilidad ang guinalakipan sang “monobloc chairs, lamesa kag mga hampanganan sa diin ang tinutuyo sini nga proyekto ang paghatag atensyon sa kinahanglanon sang Pre-schoolers sa mga Day Care Centers agud mangin masulhay ang pag-angkon sang edukasyon bilang preparasyon sa ila pagsulod sa elementarya.

Sa mensahe ni Gov. Tanco, “kinahanglan nga mahatagan sang pagtamod ang buasdamlag sang kabataan gikan sa suporta sang gobierno kay pagadal-on ini nila sa pagdaku.”

Nakabaton ang mga Day Care Centers sa mga sitio sang Tagubong, Maripo, Stock Farm, kag 2 ka Day Care Centers sa proper sang brgy. Bungsuan sang tig-24 nga monobloc chairs kag apat ka monobloc tables.

Kasubong man nakabaton ang mga Day Care Centers sang sitio Agtungaw kag sa proper sang kabaranggayan sang Lawaan, Codingle, Tamulalod kag Astorga sa banwa sang Dumarao.

Guinkalipay gid sang mga opisyal sa barangay, day care workers kag mga kabataan ang lihok ni Gov. Tanco nga nagpadulong sa ila agud sa paghatag sang mga kagamitan nga mapuslanon sa edukasyon.

Kaubay sang gobierno probinsyal ang United Nations and Children’s Fund (UNICEF) nga naghatag sang mga hampanganan, mapuslanon nga libro pangkabataan kag iban pa nga kagamitan sa Day Care Centers para sa kabataan.

Kaupod ni Gov. Tanco nga nagtugyan sang mga kagamitan sanday retired Gen. Roberto Lastimoso, Victor L. Tanco Jr., Board Member Esteban Evan Contreras II kag ang mga katapo sang Capiz Provincial Social Welfare and Development Officce sa pagpamuno ni Mrs. Violeta Silva. (CPPB/Jonathan Palomar kag Mariella Sibugan)

 Capiz Provincial Press Bureau