Capiz News: Elektripikasyon sa Brgy. Fernandez gin-inagurahan
MAAYON, CAPIZ – Ginpangunahan ni Gov. Victor A. Tanco ang madinalag-on nga inagurasyon sang Power Lines sa Sitio Bang-Bang, Barangay Fernandez sa banwa sang Ma-ayon sang Oktubre 28.
Kapin sa 32 ka panimalay ang naka- benepisyo sang pagtukod kag pagbutang sang bag-o nga linya sang kuryente sa nasambit nga sitio.
Suno kay Governor Tanco, “isa ini ka daku nga kadalag-an sang pumoluyo bangud nahatagan sang solusyon ang ila madugay na nga kinahanglanon sa ila barangay kag sabat sa ila matag-adlaw nga pagpangabuhi.”
Ang nahinambitan nga inagurasyon gintambungan sang mga matag-as nga opisyal sang Maayon nga sa pagpanguna ni Mayor Belegio Dueñas, Vice Mayor Wilfredo Borres, mga katapo sang sangguniang bayan, Brgy. Captain Mariano Diaz kag opisyales sang Brgy. Fernandez.
Capiz News, Capiz, Electrification, Capiz Province
Capiz News, 195 ka mangunguma sang mais nakabaton sang bulig pinansyal
MAAYON, CAPIZ - Nakaagum sang benepisyo ang kapin sa 195 ka mga mangunguma sang banwa sang Maayon sa ginhatag ni Gov. Victor A. Tanco nga Corn Production Loan Assistance sadtong Oktubre 28.
Nagabalor sang P 10,000 kada isa ka mangunguma ang nakabaton sang pahulam nga may diutay nga saka nga igapatong kag ini pagabayaran sa sulod sang 150 ka adlaw o sa lima ka bulan.
Ang Corn Production Loan Assistance ang una nga programa sang probinsya sang Capiz nga diri pa lang sa banwa sang Maayon natigayon para mabuligan ang mga mangunguma sa sini nga banwa nga nahalitan sadto sang bagyo nga Frank.
Nagpasayud si Gov. Tanco sa iya pagpamulong-pulong nga kon mangin madinalag-on ini nga programa mahimo nga paga-ilugon sang iban nga kabanwahanan agud makabulig sa mga mangunguma labi na gid ang nagapananum sang mais.
Ang gobernador nagpabutyag man nga daku ang katungdanan sang mga mangunguma sa ila nasandig ang kadalag-an sang nahinambitan nga programa kag dapat maga-damo ang ila patubas sang mais para makabayad sa sini nga pautang kag mabalik sang siyento porsiyento agud sarang naman magamit ang kuarta sa masunod nga pananum sang madamo nga mangunguma ang nagakinahanglan.
Suno pa sa Gobernador, ang ini nga programa nagapamatuod lang nga ang gobierno probinsyal, mga opisyal sang Maayon nga nagtambong sa ginpatigayon nga Loan Distribution ang naga-ulikid sa mga problema sang mga pumoluyo sa kabarangayan sa sini nga banwa. (MARIELLA SIBUGAN)
Capiz News, Capiz Provincial Government, Capiz, Agriculture
Capiz News: 8 ka biktima sang Filariasis ginbulong
TAPAZ, CAPIZ – Personal nga nagpadulong si Gov. Victor A. Tanco sa Tapaz District Hospital sang nagligad nga Nobyembre 22, 2008 aud hibaluon ang kahimtangan sang walo (8) ka biktima sang asakit nga Filariasi sa tapaz District Hospital sadtong Nobyembre 22, 2008.
Ang walo ka biktima sang nasambit ga sakit lunsay mga kalalakihan kag mga pumoluyo sang banwa sang Tapaz.
Sa sini nga kaangtanan, nagpahayag si Gov. Tanco sang iya pagpasalamat sa mga doktor nga naghatag sang ila serbisyo kag kinaadman sa pagbulong sang nahinambitan nga balati-an.
Subong man, sa ginpatigayon nga medical mission naghiwat ang gobierno probinsyal kag ang Rotary Club of Metro Roxas sang malip-ot nga programa sa diin ginpanghatag ang Certificate of Appreciation sa mga doktor lakip man ang pagpanginbulahan ni Gov. Tanco sa mga tawo nga ara sa likod sang sini nga hilikuton para mahatagan sang solusyon ang pumoluyo nga apektado sang Filariasis sa banwa sang Tapaz. (MARIELLA SIBUGAN)
Capiz News, Health, Capiz
