PROBINSYA SANG CAPIZ - Ginpamatud-an ni Governor Victor Tanco ang iya mabaskog nga pagsuporta sa sektor sang agrikultura sa probinsya paagi sa pagpatigayon nga maka-angkon ang mga mangunguma paagi sa ila mga organisasyon sang mga kagamitan sa pagpanguma.
Isa sa mga una nga ginhikot ni Governor Tanco amo ang traktora para sa mga mangunguma sa mga banwa sang Panit-an kag Sigma nga isa-isa nga gintugyan sang gobernador sa ila mga Local Chief Executives kag mga pinuno sang mga organisasyon sang mga mangunguma nga mga benepisyaryo sang nasambit nga makinarya.
Ginhatagan sang inspirasyon ni Governor Tanco ang mga Sigmahanon paagi sa iya mensahe, “guinatuman ko lang ang akon slogan…Labi sa tanan ang Tawo kag ang ini nga programa para gid sa tawo.”
Suno kay Provincial Agriculturist Sylvia De la Cruz ang traktora isa ka sahi sang 4-Wheel Drive Farm Tractor nga may ikasarang nga mag-kultibar sang malapad nga hulumayan kag iban pa nga sahi sang kaumahan katulad sang mais kag tubo.
Ang labing ulihi nga gintugyan sang gobernador amo ang farm tractor sang Pari-an Agrarian Reform Beneficiaries Multi-Purpose Cooperative sang Barangay Parian sa banwa sang Sigma.
Ang makinarya gintugyan ni Governor Tanco sa kooperatiba, nga guinapamunu-an ni Arminda Aguanta, paagi kay Mayor Maria T. Andaya sang Sigma sa ti-on sang isa ka turnover ceremony nga ginhiwat sang Oktubre 13, sini nga tuig.
Sang damlag lang, gintugyan man sang gobernador ang isa ka Farm Tractor sa banwa sang Panitan agud labi nga makabulig sa pagpasanyog sang ila agrikultura.
Isa ka Memorandum of Agreement ang ginlagdaan sa tunga ni Governor Tanco kag Ginang Aguanta para sa nasambit nga makinarya sa ti-on sang seremonya.
Ang seremonya ginsaksihan nanday Punong Barangay Melvin Caporal sang brgy. Parian, mga tiglawas sang mga natungdan nga ahensya sang gobierno, iban nga mga opisyales lokal sang Sigma kag probinsyal, kag mga katapu sang media.
Ang pagpabaskog sang sektor sa agrikultura kabahin sang programa ni Governor Tanco nga mapasanyog ang ekonomiya sang probinsya sunu sa iya Five-Pillar Development Agenda nga nasandig sa iya tinutuyo sa “Pag-Ulikid – Labi sa Tanan ang Tawo.”
Ang nasambit nga kahiwatan gintambungan man nanday Mayor Andaya, Vice Mayor Quirao, miyembro sang Sangguniang Bayan, mga kapitanes sang banwa sang Sigma kag mga mangunguma.
Samtang sang damlag lang, matapos nga maglaslas ang bagyo Frank nagpanagtag sang gobierno probinsyal sang binhi sang humay para sa apektado nga mga mangunguma agud liwat sila nga matibawas.
Ginsuportaha man ni Gov. Victor A. Tanco ang pagpasanyog sang produkto sang mais sa banwa sang Maayon kag personal niya nga ginhatag ang tseke nga may kantidad nga isa ka milyon ka pisos kay Mayor Belegio Dueñas.
MARIELLA SIBUGAN kag JAMES CABAG (PIA-Capiz)
Capiz News, Capiz Provincial Government News
PROBINSYA SANG CAPIZ – Ginkilala ang probinsya sang Capiz bilang pinakamanami nga tianggi sa ginhiwat nga ika-19th nga Philippine Travel Mart (PTM) sa SM Megamall, Mandaluyong City sadtong Septyembre 12 tubtob 14, sining tuig.
Ang tianggi sang Capiz nga gindumalahan sang Capiz Provincial Tourism Office nga nagpasundayag sang mga kurtina, chandelier kag picture frame, tanan human sa Kapis Shells, kalakip na ang mga nagapanguna nga produkto gikan sa probinsya sang mga Capiznon.
Dugang pa, nagpahayag ang mga Philippine Tour Operators Association (PHILTOA) nga ila gid guinakalipay ang partisipasyon sang probinsya sang Capiz kag ini ila iga-upod sa ‘tour package” ang Capiz sa educational, adventure kag leisure trips kay suno sa nasambit nga grupo masami na lang guinabisitahan ang mga lugar kasubong sang Cebu, Dumaguete, Bohol kag Davao.
Ang Philippine Travel Mart napasad sa pagpakigbuylog sang Department of Tourism, Philippine Convention and Visitors Corporation, Philippine Tourism Authority kag PHILTOA bilang manugpatigayon sang pagpasundayag kag pagpasangkad sang turismo sa Pilipinas.
Sa karon nga tuig ang PTM may tema, “Taking Tourism to Triple Extreme: Adventure, Leisure and Wellness.”
YVETTE ANDION
CAPIZ PROV’L TOURISM OFFICE
Capiz News, Capiz Provincial Government News
PROBINSYA SANG CAPIZ – Ginpangunahan ni Gov. Victor A. Tanco ang ginpatigayon nga Conference-Workshop on “The Environmental Security on Tourism (TEST),” nga maga-serbi nga sandigan sa pag-amlig sang aton palibot kag pagpasanyog sang turismo nga guinhiwat sa San Antonio Resort, barangay Baybay, syudad sang Roxas sadtong Septyembre 15, 2008.
Sa mensahe ni Governor Tanco iya ginpasalamatan ang mga ahensya sang gobierno nga nagabulig sa sini nga programa kag suno sa iya yara ang gobierno probinsyal nga handa mag-suporta sa hilikuton sang sini nga programa.
Ang TEST kabahin sang programa sang Department of Tourism (DOT) kaupod ang National Defense College of the Philippines—Crisis Management Institute kag Hariborn Foundation. Kaupod man nga nagasakdag sa nasambit nga programa ang Department of Trade and Industry (DTI), Department of Interior and Local Government (DILG), nanuhaytuhay nga mga Local Government Units (LGUs) kag iban pa nga mga pribado nga sektor.
Arnold B. Alarcon Jr.
PROBINSYA SANG CAPIZ – Personal nga gintugyan ni Gov. Victor A. Tanco ang isa ka milyon ka pisos (P1,000,000.00) nga tseke kay Mayor Dante Bermejo sang banwa sang Panay sadtong Septyembre 29, 2008 para mas labi nga mapasanyog ang turismo sa maragtason nga banwa sang mga Pan-ayanon.
Suno kay Governor Tanco, “kinahanglan naton protehiran kag pasanyugon ang turismo sang Panay bangud kabahin ini sang manggad sang mga Capiznon.”
May pito ka kilometro gikan sa syudad sang Roxas ang kalayu-on sang banwa sang Panay kag diri nahamtang ang maragtason nga simbahan sang Sta. Monica kag ang pinakadaku nga Lingganay sa bug-os nga Asya nga human sa 76 ka sako’ nga pilak nga may kadakuon sang pito ka tapak, may kataason nga duha ka metros, nagabug-at sang 10.4 tolenada kag ang iya pagbagting mabati-an sa kapin sa 8-kilometros.
Daku man ang pagpasalamat ni Mayor Dante Bermejo sa paghatag suporta ni Governor Tanco para nga maduso kag maamligan ang turismo sa Panay.
Sang damlag lang, guinsuguran na ang konstruksyon sang pila ka bahin sang banwa agud liwat nga mapanumbalik ang kinaiya sang nasambit nga komunidad sang ini guinsakop sang mga dumoluong nga katsila.
Nahibaluan nga pinaagi sa bulig pinansyal sang gobierno probinsyal sa pagpamuno ni Gov. Vic Tanco guinabuko sang lokal nga panguluhan sang nasambit nga banwa nga magpa-obra sang talatapan sang turismo agud makagiya sa mga turista sa pagpadulong sa destinasyon kon sa diin nahamtang ang mga “tourist spots” maluwas sang Lingganay, simbahan sang Sta. Monica, diri man makit-an ang malawig nga baybayon sang duha ka magkatambi nga barangay sang Pawa kag Buntod; ang bakhawan sa barangay Pawa kag ang madugu-on nga istorya sang tulay Tadiao, nga sakop sang magkamtabi nga barangay sang Linateran kag Bato.
SERBISYO LEGAL
Pagkaayo sang sayop sa Sertipiko sang Pagbun-ag
Pinalangga nga
Attorney Villanueva
Dayawon ang Dios! Ang tawo nga kasubong ta nga indi makasarang sang serbisyo sang abogado, sa karon may yara na nga masandigan sa paglubad sa problema tuhoy sa kasugoan.
Ang akon anak nagabuko kon tani mag-abroad matapos ang iya gradwasyon sa kolehiyo apang sang i-submiter niya ang sertipiko sang iya pagbun-ag, nasapwan ang sayop nga “spelling” sang panguna niya nga ngalan, kag subong man ang “spelling” sang panguna nga ngalan sang akon bana.
Nagpakig-konsulta ako sa pribado nga abogado pero guinasukot ako sang P30,000.00 para sa iya serbisyo legal angot sini nga pag-koreksyon, kag wala pa diri masakop ang iban pa nga balayaran.
Mahimo mo bala ako mabuligan sa sining akon nga problema? Nabaligya ko na ang akon karabaw kag ang motorsiklo sang akon bana para i-gasto sa akon anak nga malakat sa “abroad” kay sia gid lamang ang paglaum sang pamilya.
Ano bala ang himuon namon agud makakuha sang husto nga sertipiko sa pagbun-ag nga indi na magbayad sang dku nga kantidad para ssa serbisyo legal?
Ang amon lamang pangamuyo nga madulotan ka sang ikaayong lawas kag kadalag-an sa tanan mo nga pagtimakas, ang mahatag namon nga kabayaran sa imo pagbulig sa amon.
RFG
Tapaz, Capiz
Pinalangga nga RFG sang Tapaz:
Natandog gid ako sa imo pagtamyaw kag sa hingapusan mo nga tinaga sang imo sulat. Bilang kabahin sang akon FREE LEGAL AID sa tanan nga mga Capizeños, ilabi na sa mga tawo nga kasubong sa imo, buligan ko ikaw nga mahatagan sang kalubaran ini nga problema legal sa pinaka-simplI kag indi magasto nga pamaagi.
Ini sandig sa programa sang aton pinalangga nga gobernador, Hon. Victor A. Tanco, Sr. nga amo ang “Pag-ulikid: Labi sa Tanan ang Tawo.”
Ang imo kaso isa lang ka simpli nga PAGKAAYO SANG “CLERICAL O TYPOGRAPHICAL” NGA KASAYPANAN SA REHISTRO SIBIL SANG IMO ANAK.
Sa idalum sang Akta Republika No. 9048 ukon ang “Change of Name Without Judicial Order,” mahimo ka lang magkadto sa inyo nga Municipal Civil Registrar kag i-presentar sa ila ang imo problema kay may natungdan sila nga pamaagi tuhoy sa pagkaayo sang sayup nga ngalan, hayo, apelyido, lugar sang pagbun-ag, ukon sa kasubong sini nga mahimo makaayo suno sa ila katungdanan, nga indi na kinahanglan ang abogado sa sini nga katuyoan.
Ang lokal nga Civil Registrars posibli may yara nga pro-forma petisyon (Affidavit) nga buhaton sang naga-petisyon sa kasubong mo, sa sini nga kaso.
Sa sini nga bagay, bisan sa ano nga paagi, may mga kinahanglanon kag pagsulondan nga pagatumanon:
1. Affidavit (Petition)
2. Kopya sang Sertipiko nga nagapamatuod sang pahina sa libro sang rehistro sa diin may entrada nga pagakaayuhon.
3. Duha (2) ka dokumento nga nagapakita sang husto nga “spelling” sang ngalan, pareho sang school records, I.D., Driver’s License, kag iban pa.
4. Iga-balhag ang imo petisyon kis-a sa duha ka nagasunod nga semana nga isyu sang peryodiko nga may daku sang sirkulasyon.
5. Pagpaskel sang imo petisyon sa madali makit-an nga lugar.
Ang petisyon guina-aktuhan sang Local Civil Registrar sa sulod sang lima ka adlaw nga may opisina, matapos matuman mo ang nahinambitan nga mga kinahanglanon.
Diutay lamang kag kasarangan ang imo balayaran sa talatapan sang Local Civil Registrar. May balayaran man sa pagbantala sa peryodiko apang indi ka na magbayad sang Attorney’s fee kag iban pa nga service fee.
Sa dugang nga detalye kag matul-id nga kasayuran, indi magkatahap nga magpakigkita sa akon talatapan sa ikaduha nga panalgan sang Kapitolyo Probinsyal, syudad sang Roxas.
Ang tanan ko nga serbisyo guinatanyag ko sing LIBRE kay ini kabahin sa tawhanon nga pagpangalagad ko kaupod ang halangdon nga Gobernador Victor A. Tanco, Sr. ang nagapasalig sa mga Capizeños.
Salamat sa imo pagsalig sa amon. Bugayan ka sang mahal nga DIOS.
PROBINSYA SANG CAPIZ – Guinapatigayon ka da Sabado sang gab-i ang “Saot Capiz,” ang pinakauna nga “dance season” kag ini guinsuguran sadtong Septyembre 27, 2008 sa Provincial Park, syudad sang Roxas.
Ang nasambit nga pagpasundayag sang kinaadman sa pagsaot kag paglaragway sang kultura sang mga Capiznon ang guinadumalahan sang Provincial Tourism Office sa bulig sang National Commission for Culture and Arts (NCAA) kag sa suporta ni Gov. Victor A. Tanco kag sang gobierno probinsyal sang Capiz.
Sa panugod sang nasambit nga kahiwatan nga guinalakipan sang napulog tatlo (13) ka hubon, kasubong sang Dagway Sigmahanon Inc., Capiz National High School Dance Troupe, Tapaz Cultural and Performing Arts, Gentxt, CPC High and Dance Troupe, Filamer Christian College Dance Troupe, Handurawan Cultural Dance Troupe, Hugyaw Cultural Group Capusu sang Mambusao, Capiz; Tribu Kasadyahan sang Pilar, Caguyuman Dance Troupe sang Pontevedra, Capiz; CapSU Main Campus Dance Troupe, Sinadya Dance Troupe sang DepEd Roxas City kag Grand Binayle.
Personal nga nagtambong Gov. Victor A. Tanco, Mayor Jose Alba sang Mambusao, OIC-Provincial Tourism Officer Alphonsus Tesoro, NCCA Executive Committee Member Annie Sartorio kag mga dungganon nga mga bisita nga naga-ulikid sa kultura sang Capiznon.
Sa mensahe ni Governor Tanco iya guinpasalig nga bug-os ang suporta sang gobierno probinsyal sa programa sa pagpasanyog sang kultura sang Capiznon.
“Maabot gid ang adlaw nga maka-diskubre ang probinsya sang Capiz sang panibag-o nga national artist nga mapabugal sang mga Capiznon,” dugang nga pahayag ni Gov. Tanco
FROILAN UNARCE
Capiz Tourism, Capiz News, Capiz Provincial News
Madamo sang estilo kag sahi sang pamaagi ang pagdul-ong sang guinatawag nga serbisyo publiko sa bahin sang mga lamharon kag bonggaitan nga mga politiko.
May nagasiling nga sa tagsa ka serbisyo may yara sang kabaylo kag ini tanan kabahin lang sang politika kag personal nga pamulitika sa pungsod kag sa nasakupan nga mga lokal nga pamunuan nga may dumaan nga sistema sang pang-guinobierno.
Sang mabati-an ko ang mensahe ni Gov. Victor A. Tanco sa isa ka hilikuton kon sa diin sia ang dinapit nga bisita, “Pag-ulikid: Labi sa tanan ang Tawo…amo ini ang interpretasyon ko sang serbisyo publiko.”
Sa mensahe nga ginpahayag sang gobernador, may mga opinyon nga nagasiling…politiko si Tanco, apang sa pihak nga bahin may nagapahayag nga para sa tawo si Tanco.
Ang duha ka magtimbang nga opinyon nga akon nabati-an sa isa okasyon pareahas nga may puntos bangud si Governor Tanco nangin ika-20 nga gobernador sang probinsya sang Capiz matapos nga nagpapili sia sa patag sang politika sa pagka-gobernador sang probinsya kag ginhatagan sang mayoriya nga pagsalig sang pumoluyo agud pangalagaran ang mga Capiznon. Samtang kon may opinyon man nga nagasiling nga si Governor Tanco para sa tawo kay ina ila na nabatyagan kag mahimo nga napamatud-an na sang gobernador.
Basta ano man ang mangin sitwasyon, mapa-ekonomiya, agrikultura, inprastraktura, edukasyon kag ikaayong lawas kalakip na dira ang mga wala guinapaabot kasubong sang kalamidad, kreminalidad kag krisis, ina tanan kabahin sa Pag-ulikid ni Governor Vic Tanco nga labi sa tanan ang tawo nga amo ang iya inspirasyon sa pagserbisyo.
SYUDAD SANG ILOILO – Kapin sa duha ka libo ka mga estudyante ang nagtililipon agud pamatian ang mensahe ni Senador Mar Roxas sa ginpatigayon nga hinun-anon sang Alliance of Students in Iloilo sa auditorium sang Unibersidad sang Pilipinas—Visayas sa syudad sang Iloilo sadtong Septyembre 19.
Ang nasambit nga hinun-anon ang may tema “Students: Move, Ac t, Reform (SMAR).” Ini nga alyansa sang mga estudyante ang guinapangunahan sang mga student council kag organisasyon sa pribado kag pampubliko nga eskwelahan kag unibersidad sa syudad kag probinsya sang Iloilo.
Ginpahayag ni Senador Mar Roxas nga ang malala nga korapsyon sa gobierno ang isa sang mga rason kon ngaman nalubong ang pungsod Pilipinas sa tuman nga kaimulon.
Gindugang pa sa pagpahayag sang Senador nga kinahanglan dal-on sang mga kabataan ang kawsa sang reporma sa edukasyon.
“Ang ini nga reporma ang magabalay sang praktikal nga edukasyon, kon sa diin magamit sang mga pamatan-on ang ila mga natun-an bilang sandigan sang ila buasdamlag,” sun okay Senador Roxas.
Ginpaathag sang Senador sa mga estudyante nga ang reporma sa edukasyon ang mangin katimbang sa pagtib-ong sang ekonomiya.”
Sa nasambit nga hinun-anon, si Rommel John Edang sang West Visayas State University ang nagpamangkot kay Senador Mar Roxas kon may plano ini nga magkandidato bilang Presidente sang pungsod Pilipinas sa maabot nga 2010 nga eleksyon.
Apang ginsabat ini sang Senador, paagi sa isa man ka pamangkot, “Pamangkuton ko ikaw, ano ang luyag mo nga himuon ko…Rommel?”
“Nagasalig ako sa imo ikasarang kag aydiyalismo nga makabulig sa pagpa-umwad sa aton pungsod,” ini ang sabat sang estudyante nga si Rommel.
Apang liwat nga ginpamangkot sang Senador ang estudyante kon “ano ang luyag mo nga himuon?” kag ini ang ginsabat ni Rommel, “Huo, kandidato ka sa pagka Presidente.”
Ang sabat sang estudyante ang ginsuportahan sang isa ka mabaskog nga palakpak, palatandaan sang mabaskog nga suporta kag pagkilala kay Senador Mar Roxas nga paborito sang mga estudyante nga Ilonggo. (edbasilonia)
PONTEVEDRA, CAPIZ – Madinalag-on nga ginhiwat ang Local and Regional Economic Development (LRED) implementation orientation program sa pagpanguna ni Gov. Victor A. Tanco kag Mayor Jose Esteban Contreras sang Pontevedra sa pagpasanyog sang Small and Medium Enterprise Development on Sustainable Employment Program (SMEDSEP) sa banwa sang Pontevedra sang damlag lang.
Sa mensahe ni Governor Tanco, iya ginkalipay nga ang banwa sang Pontevedra ang ginpili sang SMEDSEP sa sini nga programa sang Department of Trade and Industry (DTI).
Sa proseso sang LRED nalakip diri ang pagdihon sang plano, estratehiya kag pag-monitor sang mga proyekto nga guinatapuan sang pampubliko kag pribado nga negosyo nga daku naman ang potensyal sa lokal nga merkado.
Froilan Unarce
Capiz Provincial Government News, Capiz News
PROBINSYA SANG CAPIZ – Liwat nga nagtililipon ang 85 ka katapo sang VIC Scholar agud maghinun-anon kay Gov. Victor A. Tanco sa pila ka pagsulundan sang gobierno probinsyal sadtong Septyembre 6, 2008 sa Hall of Governor’s sang kapitolyo Probinsyal, syudad sang Roxas.
Suno sa pagpahayag ni Raquel Olandia, Chief of Staff sang Gobernador nga amo man ang tsirman sang Scholarship Management Group, “kapin sa 81 sa kabog-usan nga 85 ka mga iskolar ang nagtambong sa nasambit nga pagtililipon sa diin ginpanghatag ang book allowance sa mga iskolar nga ang ila tuition fee wala magsobra sa P1,000.00.
“Ang mga iskolar nga nagakuha sang apat katuig nga kurso sa kolehiyo sa publiko man ukon pribado nga bulothuan diri sa Capiz magluwas lamang sa mga first year college nga naka-enroll sa publiko nga bulothuan nga sakop sang isla sang Panay,” nagdugang nga pahayag ni Olandia.
Ang VIC Scholarship Program nagdugang sang “kategoriya B” para sa apat katuig nga kurso ukon bkasyonal para sa kabataan sang mga empleyado sang gobierno probinsyal sang Capiz nga manubo ang sueldo.
Sa mensahe ni Governor Tanco iya guinsiling nga “tumalagsahon lang ang mangin Iskolar sang Capiz kag ini dapat nga inyo timakasan agud inyo malab-ot ang inyo mga handum bangud ang edukasyon mangin dalan padulong sa kadalag-an.”
Capiz News, Capiz Provincial Government News
PROBINSYA SANG CAPIZ – Nangin madinalag-on ang imbukada sang programa sang Teatro Kapisnon sa Governor’s Hall sang Kapitolyo Probinsyal sadtong Septyembre 5, 2008.
Ang nasambit nga programa gintambungan sang pila ka sumalakdag sang kultura, empleyado sang gobierno, guinikanan, manunudlo, estudyante kag mga katapo sang media.
Ang mga gumolowa sang Teatro Kapisnon liwat nga nagbuhi sang mga tumaandok nga ambahanon nga bantog sadto diri sa Capiz kag gin-amba sa modern nga bersyon nga guinalakipan sang “saot, tagsubong sang Kundansoy, Ili-Ili, Gugma Tigulang, si Felimon kag Lumabay nga daw aso.”
Ginpabati man ang komposisyon nila sang ambahanon nga “Pag-ulikid.”Nakunyag gid ang mga tumalambong sa iban pa nga presentasyon sang Teatro Kapisnon pareho sang Ballroom Medley kag ang Eskotis de Kapis, Folk Dance, samtang ang modern dance ginsaot sang duha ka grupo sang mga lamharon.
Si Atty. Jose Villanueva, Chief Legal Counsel sang probinsya, natandog gid sa maduagon nila nga pasundayag nga nagpakita sang dagway kag kultura sang Capiz sa diin amo ang katuyuan nga gintukod ining “Pag-ulikid Cultural Project” sa inspirasyon nga ginhatag ni Gov. Victor Tanco kag Sen. Mar Roxas, suno sa iya mensahe.
Subong man nagsiling sia nga ang nasambit nga palaguaon nagalaragway man sa balatyagun kag ikasangkol ni Governor Tanco.
Suno kay Gov. Victor A. Tanco, “ang Teatro Kapisnon isa lamang ka behikulo nga magati-og padulong sa mga nabaw-ing nga kabaranggayan sining probinsya agud maglaragway sang mga hilikuton sang aton opisyal.”
Ang Teatro Kapisnon isa ka proyekto sang gobierno probinsyal sa pagdumala ni Atty. Noede Villareal, consultant on cultural affairs.
RAMON ATINON
Capiz Provincial Government News, Capiz News
PROBINSYA SANG CAPIZ – Nangin madinalag-on ang paghiwat sang ika-siyam nga “Boys and Girls Week” sang Rotary Club of Metro Roxas (RCMR) nga ginpatigayon sang Septyembre 22 tubtob 26, 2008 sa Hall of Governors sang Kapitolyo Probinsyal, syudad sang Roxas.
Suno sa pahayag ni Capiz Senior Board Member Esteban Evan Contreras II, presidente sang RCMR, “nga ang nasambit nga hilikuton isa ka proyekto sang Rotary Club of Metro Roxas para sa mga estudyante nga sa ila lamharon nga edad magiyahan na sila kon paano ang mangin kabahin sang ehikutibo, lehislatura kag kon paano ang magdumala sang lokal nga gobierno.”
Ang RCMR Boys and Girls Week nagsugod sang tuig 1999 kag ini guinapatigayon sa tagsa ka tuig sa bulig kag koordinasyon sang gobierno probinsyal sang Capiz kag sang lokal nga talatapan sang Department of Education (DepEd). Ini bukas sa mga “top 5” nga estudyante sa sekondarya sang pribado kag pampubliko nga eskwelahan sang DepEd Capiz.
Ang tagpumalasakop ang guinapaidalom sa pasinawan kon sa diin ang “top 20” sa nasambit nga eksaminasyon ang ipaidalom sa isa ka pagpakighinun-anon sang mga hurado tubtob nga ma-determinar ang napulog anom (16) ka mga estudyante.
Ang 16 ka estudyante nga opisyal nga napilian nga magbug-os sang RCMR Boys and Girls Week pagahatagan sang isa ka semana sa pagpangalagad bilang mga opisyal sang lokal nga gobierno sang Capiz.
Ang nasambit nga programa sang RCMR nakaangkon sang todo nga suporta gikan kay Gov. Victor A. Tanco kag sa gobierno probinsyal sang Capiz; Dr. Angel Gilvas kag sang talatapan sang DepEd Capiz kag sang nagkanuhay-tuhay nga mga bulothuan sa probinsya sang Capiz bilang pagkilala sang maayo nga katuyuan sang sini nga programa.
Ang Rotary Club of Metro Roxas nagapati nga pinaagi sa sini nga hilikuton makaangkon ang aton probinsya kag pungsod sang isa ka lider nga may direksyon ang pang-guinobierno agud mahatagan sang kasulhayan ang ekonomiya nga amo ang katumanan sang handum sang mga pumoluyo nga naga-anggid sa team karon nga tuig sang Rotary International “Make Dreams Real.”
Ang napulog anom (16) ka mapalaron nga mga estudyante nagikan sa nagkanuhay-tuhay nga mga boluthuan sa probinsya sang Capiz kag sang mga palangakuan nga ila naangkon pinaagi sa isa ka pasinawan, amo sanday:
Governor Raize Khey Llorico Jamindan National High School
Vice Governor Kara Micaj Trogo Capiz National High School
Board Members:
1st District Mary Rachelle Legaspi Capiz National High School
1st District Martha Alyssa jolo Capiz State University
1st District Maria Angelica Asis Capiz National High School
1st District Anne Bridgette Ledesma Capiz National High School
1st District Ana Amor Albar Hipona National High School
2nd District Christianne Anne Pimentel Cuartero National High School
2nd District Jelly Barrion Ivisan National High School
2nd District Marianne Gamayao Lonoy-Sapian National High School
2nd District Denmark Llanera Jagnaya National High School
2nd District Glena Grace Tolentino Sapian National High School
Philippine Councilors League Lorna Bibit Don Felix Memorial National High School
Liga ng mga Barangay Carmela Deocampo Maayon National High School
Sangguniang Kabataan Regino Hibaler Capiz National High School
Provincial Administrator Lynde Fuego Vicente Andaya National High School
ALLEN HERVIAS
Rotary Club, Capiz Provincial News, Capiz News
PROBINSYA SANG CAPIZ – Guinpangunahan ni Gov. Victor A. Tanco ang gobierno probinsyal sang Capiz sa paglunsar sang Grantisadong Pambata (GP) sa ikaduha nga kahigayunan nga ginhiwat sadtong Oktubre 10, 2008 sa Dadivas Civic Center, Panitan, Capiz.
Ang Garantisadong Pambata isa ka programa sa ikaayong lawas nga naka sentro sa mga bag-ong bun-ag tubtob lima ka tuig nga mga kabataan.
Ini guinapatigayon sa bulan sang Abril kag Oktubre kag may libre nga walo ka serbisyo kaangay sang Vitamin A, Bakuna kag Purga.
May guinahatag man nga importante nga impormasyon sa mga guinikanan kag manugbantay nahanungod sa pagbusong, pagpasuso kag nagakasanto nga nutrisyon para sa ikaayong lawas sang mga kabataan.
Sa sini nga tuig, ang paglunsar sang GP guin-organisar sang Provincial Health Office kaupod sang lokal nga panguluhan sang Panitan.
Kaupod ang ila ginikanan, may kapin sa dos siyentos singkwenta (250) ka mga kabataan ang nakabaton sang kumpleto nga serbisyo sang GP, kalakip sang pag-eksamin sang ila mga ngipon kag nakabaton sang libre nga “toothbrush” kag “toothpaste.”
Ang nasambit nga hilikuton guintambungan sang mga bisita gikan sa DOH Regional Office, Rotary Clubs of Roxas and Metro Roxas, Capiz Medical Society, Media, mga ahensiya sang United States for International Development (HealthGov, HealthPro, and Project A to Z) kag iban pa.
Sa mensahe ni Gov. Tanco, iya gid guinapangabay ang komunidad, mga opisyales kag iban pa nga magbinuligay agud masigurado ang kadalag-an sang GP kag subong man ang buasdamlag sang mga kabataan.
Sa sini nga bulan, ang mga guinikanan kag manugbantay guinahingyo nga dalhon ang mga bag-ong bun-ag tubtob lima katuig nga kabataan sa pinakamalapit nga health center kag mag-agum sang libre kag kumpleto nga serbisyo sang Garantisadong Pambata.
DR. RAOUL A. BERMEJO, M.D
Capiz Provincial Government News, News, Capiz News
PROBINSYA SANG CAPIZ – Natalana nga magpadulong sa Metro Manila ang Capiznon nga si Argie Nobleza para sa magpasakop sa 18-anyos paubos nga kategoriya sang 2008 National Shell Chess Active finals sa palaabuton nga Nobyembre 8 kag 9, 2008.
Si Nobleza nga nagpangatlo para sa Western Visayas Shell Chess Active elimination nga ginhiwat sa syudad sang Iloilo sadtong Agosto 2008, matapos ang pito ka sambuwa sia ang nakapuntos sang 6-ka daog, wala pierde kag isa ka patas. Natabuan nga manubo ang mga “tie-break” ni Nobleza kabangdanan nga sawai nga medalya ang iya naagom.
Sa edad nga 17-anyos sang estudyante nga yara na sa third year college kag nagakuha sang kurso nga Nursing sa Filamer Christian College, madamo na sia sang napasakupan nga engkwentro sa chess. Sang tuig 2000, una nga nakatilaw sang pungsodnon nga kumpetisyon si Nobleza kag nasungkit niya ang pilak nga medalya sa Batang Pinoy; Madamo naman nga beses nga nakapasakop sia sa mga prestihiyuso nga hinampang sang pribado kag pampubliko nga bulothuan kasubong Western Visayas Regional Athletic Association (WVRAA), WV Private School Athletic Association (WVPRISAA) kag Palarong Pambansa; Sia man ang kampeon sa 2008 Roxas City Chess elimination nga gin-organisa sang Capiz Chess Association (CCA), Inc.; kag pinakalamharon nga nakasulod sa top 15 sang Western Visayas non-master chess elimination para sa chess Olympiad sang Team Philippines nga ginhiwat sa Old Buswang, Kalibo, Aklan sadtong Marso 2008.
Suno sa iya coach nga si Kenneth Dominador Calvez, “ang mangin kadalag-an ni Argie sa national finals sang Shell mangin bugal man naton tanan nga Capiznon kag basi sia na ang masunod nga magadala sang Roxas City kag Capiz sa mapa sang chess kasubong sang kadalag-an nanday Frederick Tumanon kag Francis Jocson.”
Si Tumanon, nangin Philippine National Junior Champion sang dekada ’70. Samtang si Jocson, ang pinakauna nga National Master sang probinsya matapos ang iya 5-0 nga record sa Cagayan de Oro sadtong Oktubre 1999 kon sa diin didto niya nakuha ang iya titulo.
“Gusto ko lang pasalamatan ang Capiz Chess Association Inc., mga tawo naga-suporta sa kampanya ni Argie, labi nag id kay Gov. Vic Tanco sa iya padayon nga suporta sa chess kag sa iban pa nga isports,” dugang nga pahayag ni Calvez.
JOHN PHILIP DARNAYLA
Capiz Sports, Capiz News
PROBINSYA SANG CAPIZ – Ginpamat-ud sang National Commission on Culture and Arts (NCCA) nga ang probinsya sang Capiz ang mangin tagbalay sa pagasaulogon nga National indigenous People’s Month (NIPM) sa bulan sang Oktubre 2009 sang ang NCCA kag ang talatapan sang Provincial tourism ang nag-sinapol sa San Antonio Lakehouse Resort sa barangay Baybay, syudad sang Roxas sadtong Septyembre 8, 2008.
Ginkalipay ni Gov. Victor A. Tanco ang ining tumalagsahon nga kahiwatan nga suno sa iya makapabaskog sang kultura sang Capiznon.
Suno kay OIC-Provincial Tourism Officer Alphonsus Tesoro sang Capiz, nagpatigayon sang pagpanayasat ang mga katapo sang NCCA sa plaibot sang dakbanwa sang Roxas kalakip na ang mga kabanwahanan sang probinsya.
Ang hubon sang NCCA guinabog-usan sang mga tiglawas gikan sa Aklan, Bicol, Iloilo, Leyte, Mindoro, Negros, Palawan kag iban pa nga lugar nga nagpatigayon sang maid-id nga pagtu-on may kaangtanan sa mga Tumandok nga pumoluyo sang aton probinsya.
Suno sa mga katapo sang NCCA, nangin halandumon ang ila pagpadulong sa Capiz kay nabatyagan nila ang pinasahi nga pag-amuma sang mga Capiznon ka gang paghatag sa ila sang pagkaon gikan sa bugay sang kadagatan sang syudad kag probinsya.
RAMON ATINON
Capiz Provincial Government News, Capiz News
PROBINSYA SANG CAPIZ – Ang probinsya sang Capiz nag-ugyon sa pangkalibutanon nga adlaw sang Turismo 2008 paagi sa pagselebrar sang Provincial Tourism Week sang Septyembre 21-27, 2008 nga may tema nga “Tourism: Responding to the Challenge of Climate Change.”
Ang nasambit nga okasyon sandig sa resolusyon numero 143-S-2008 sang Sangguniang Panlalawigan sang Capiz kag ini nga pagsaulog ginsugoran sang mga hilkuton kasubong sang “Forum- Bal-an Mo Bala?—Tourism: To the Challenge of Climate Change, Septyembre 22 kag 23; Opening of Wow Capiz!—A Photo Exhibit of Tourist Attractions, Septyembre 23; Sid-ing!—Interactive Exhibit Showcasing Destinations in Capiz, Septyembre 24-25; kag Launching of Saot Capiz!—1st Capiz Dance Season, Septyembre 27.”
Ang halos tanan nga hilikuton nangin madinuagon sa pagpanguna sang Capiz Provincial Tourism kag isa na diri nga nakahatag sang inspirasyon ang Photo Exhibit of Tourist Attractions kasubong na lang sang maragtason nga Sta. Monica Church kag ang pinakadaku sini nga Lingganay, Immaculate Conception Cathedral sang syudad sang Roxas, St. Martin of Tours Church sang banwa sang Dumalag, kag subong man ang mga man-made attractions, mga historical landmarks, beaches, caves, mangrove reforestation, seafoods, dried fish, Capiz Shells kag tumandok nga mga produkto.
Ginpabutyag man niya ang tuhoy sa Panay Bukidnon nga yara nagapuyo sa 22 ka barangay sa Tapaz kag 6 ka barangay sa Jamindan.
Suno kay Gov. Victor A. Tanco, “kinahanglan naton amligan ang aton dunang manggad kag pasanyugon ang kultura sang Capiznon.”
Si OIC-Provincial Tourism Officer Alphonsus Tesoro, “nagpanghangkat nga dulaon ang negatibo nga impresyon sang Capiz, sa baylo mahimo naton maipabugal ang matahum kag pinanubli nga kultura lakip ang makatilingala nga mga atraksyon, sa diin ini dapat naton hatagan ang mga Capiznon sang pagtamod kag importansya kay kita mismo ang makabig nga katingalahan sang Capiz.”
Ang probinsya sang Capiz amat-amat na nga guinakilala ang iya kultura kag padayon nga guinatukib ang mga dunang manggad nga nagahatag atraksyon sa mga turista.
RUEL DOCE
Capiz Provincial Government News, Capiz News
PROBINSYA SANG CAPIZ – Kapin sa isa ka gatos ka libo ka pesos (P 100,000.00) ang gintug-an ni Governor Victor A. Tanco, Sr. para sa Alay Lakad – Roxas City Chapter para nga igabulig sa mga out-of-school youth ukon mga pamatan-on nga wala naga-eskwela nga mangin produktibo nga mga pumoluyo sa komunidad.
Ang nasambit nga kantidad ang ginpanug-an sang nagligad nga Oktubre 3 bilang pag-ulikid sang administrasyon ni Governor Tanco sa mga out-of-school youth nga amo man ang target nga mabuligan sang tuigan nga Alay Lakad.
“Karon nga adlaw guinapabutyag naton ang aton pag-ulikid sa mga pigado ilabi na sa mga out-of-school youth,” ang pahayag ni Tanco sa iya mensahe sa malip-ot nga programa.
Samtang ang bag-o lang natapos nga Alay Lakad ang ginpasakupan sang kapin 17 mil ka mga Capiznon nga guinabug-usan sang mga estudyante, mga opisyal sang kabaranggayan, mga socio-civic organizations, kag madamo pa nga iban.
Basi sa record, kapin sa P235,000.00 nga kantidad kalakip ang mga pledges nga ginpaabot sang mga mabinuligon nga mga indibidwal para sa kawsa sang mga out-of-school youth ang natipon sa 2008 Alay Lakad diri sa syudad sang Roxas.
Nahibaluan nga ang Alay Lakad ang nakabulig na sa guinatos ka mga out-of-school youth sa probinsya pinaagi sa mga scholarship grants subong man ang palangabuhian nga mga proyekto.
ALEX LUMAQUE (PIA-Capiz)
Capiz News, Capiz Provincial Government News
Nagpakighinun-anon ang mga opisyales sang barangay Dapdapan, Sapian, Capiz kay Gov. Victor A. Tanco natuhoy sa ila mga prayoridad nga hilikuton sa barangay kon sa diin nangin kaupod man nila ang duha ka Sapianon nga sanday Prov’l Administrator Zoe G. Herrera, Jr. kag Prov’l Chief Legal Counsel Atty. Jose Villanueva sadtong Oktubre 16, 2008 sa talatapan sang gobernador.
Suno kay Punong Barangay David H. Obispado sang brgy. Dapdapan, ang elektripikasyon (street lights), ikaayong lawas, agrikultura, patubig kag edukasyon diri naka-sentro ang ila programa agud mahatagan sang sabat ang kinahanglanon sang ila pumoluyo kag barangay.
Ang mga opisyales nga yari sa litrato kaupod nanday Governor Tanco, Attorney Villanueva kag PA Herrera, amo sanday Punong Barangay Obispado, mga kagawad nga sanday Emerlinda A. Marcial, Terry Francis P. Varon, Medel L. Pinalba, Virgilio O. Peralta, Norman O. Barnal, Gerson J. Garcia, Verlinda O. Ochavo kag Sangguniang Kabataan Chairman Gerlen P. Cañonero. Kaupod man nila nanday Brgy. Secretary Marilyn S. Casimero kag Brgy. Treasurer Rachel Garcia.
Suno kay Governor Tanco, bukas ang iya talatapan sa pagpakighinun-anon para sa ikaayo sang tagsa ka barangay kag labi sa tanan ang tawo. (edbasilonia)
Capiz Provincial Government News, Capiz News
PONTEVEDRA, CAPIZ – Mas labi nga ginpasangkad ang kagamitan sa Bailan District Hospital (BDH) sang opisyal nga gintugyan ni Gov. Victor A. Tanco kag sang gobierno probinsyal sang Capiz ang mas o menos milyones nga kantidad sang kagamitan gikan sa St. Luke’s Hospital sadtong Oktubre 7, 2008 sa BDH, barangay Bailan, Pontevedra, Capiz.
Suno kay Governor Tanco, “pinaagi sa sini nga kagamitan mas labi pa nga mapasangkad ang serbisyo para sa pumoluyo sang Pontevedra kag sa mga kaiping sini nga kabanwahanan sa premir distrito sang Capiz.”
Ginpasalamatan man sang Gobernador ang si Mrs. Judy Araneta-Roxas nga amo ang nagpatigayon para mapadala sa gilayon ang “medical equipments” nagikan sa St. Luke’s Hospital sang syudad sang Quezon.
Ang nasambit nga “turnover” ang guintambungan nanday Mayor Jose Esteban Contreras sang Pontevedra, Dr. Ma. Venus Loretizo, OIC-Head sang BDH, Board Member Esteban Evan Contreras, Provincial Administrator Zoe G. Herrera, Jr. kag Mr. Samuel Sotel sang Step-by-Step Academy nga nagbulig man sa mga kagamitan.
Ang mga kagamitan nga gintugyan sa Bailan District Hospital kalakip sang mga masunod: 1-sofa set, 17 ka bilog sang 14-inch TV, 16 ka bilog sang refrigerator, 31 ka bilog nga plastic trash can, 9 ka bilog nga metal trash can, 1 ka hand dryer, 4 ka bilog nga visitor’s chair, 5 ka bilog nga aluminum walker, 12 ka bilog nga stacking chair, 3 ka bilog nga clerical chair, 9 ka bilog nga IV stand, 3 ka bilog nga mayo table, 13 ka foot stool, 1 ka stretcher nga wala mattress, 1 ka filing cabinet, 2 ka bilog nga stainless curtain divider, 1 wooden height gauge, 5 ka bilog nga wooden pushcart, 2 ka bilog nga computer table, 1 ka dressing cart, 1 ka dressing cart, 1 ka stainless cart, 1 ka wooden E cart, 1 ka plastic blue E cart, 1 ka medicine cabinet, 4 ka bilog nga cashier table, 1 ka wooden rack, 100 ka bilog nga bedsheets , 150 ka bilog nga punda kag 150 ka bilog nga patient gown.
Daku naman ang pagpasalamat ni Dr. Loretizo sa tanan nga nagbulig agud matigayon nga mabaton sang Bailan District Hospital ang mga kagamitan gikan sa St. Luke’s Hospital. (Dugang nga balita gikan nanday A. Hervias, F. Unarce kag R. Atinon)
MARIELLA A. SIBUGAN
Capiz News, Capiz Provincial Government News
PROBINSYA SANG CAPIZ – Kapin sa 41 ka pumoluyo sang napulog anom (16) ka barangay sang banwa sang Tapaz ang nadiskubrihan nga positibo sa sakit nga Filariasis sang magpatigayon sa pagpangusisa ang mga katapo sang Provincial kag Municipal Health Workers sang Septyembre, sining tuig.
Nagpanawagan si Gov. Victor A. Tanco sa mga pumoluyo sang banwa sang Tapaz kag sa mga tawo nga nakabatyag sang sintomas sang Filariasis nga magpakonsulta sa gilayon sa inyo mga municipal health workers agud mahatagan sang aksyon ang nasambit nga balati-an.
Suno kay Dr. Evelyn T. Bolido, Medical Specialist IV sang Capiz Integrated Provincial Health Office, sa 656 ka tawo nga ila guinpa-idalom sa pag-eksamin ila natalaupangdan nga may pila ka pumoluyo ang positibo sa sakit nga Filariasis sa barangay Acuña, Tacayan, Buri, Milan, San Julian, Candelaria, Daan Sur, Artuz, Abangay, Santa Petronila, Lagdungan, Bato-bato, Mabini, Rizal Norte, Roxas Otso kag Tangahin.
Sa paglaragway ni Dr. Bolido, nga sa umpisa wala sang sintomas nga mabatyagan. Mahibaluan lamang kon ang isa ka tawo may Filariasis kon siya magpa-eksamin sang iya dugokaangay sang pabalik-balik nga hilanat, guinapanugnawan, pangalay sang ilok kag hita lakip na ang pag-ihi nga ang duag kaangay sang hinugas sang bugas.
“Kon indi mabulong sang temprano, mahimo magadaku ang paa kag batiis kalakip na ang pagdaku sang lagay,” dugang nga paglaragway ni Dr. Bolido.
Ang pag-inom sang husto nga bulong makapauntat sa dalayon nga pagdaku sang mga nahinambitan nga parti sang lawas kag indi na makalaton sa iban nga tawo.
Ang opisyales sang Capiz Provincial Health Office nagapanugyan nga magsuksok sang bayo nga mahaba ang manggas kag magpantalon ilabi na kon sa guwa sang balay, mag-gamit sang moskitero kon magkatulog, magpahid sang “insect repellant,” kag kon puede tinguhaan nga ipa-screen ang bintana kag puertahan sang balay.
Ang mga panimalay guinapahibalo nga tapna-on ang posibli istaran o ma-itlogan sang lamok sa inyo palibot kag kon may mabatyagan kag makita nga mga sintomas sang Filiriasis, magpakonsulta gilayon sa pinakamalapit nga health center.
Guinapasalig gid sang Provincial Health Office ang publiko nga kontrolado ang sitwasyon kag padayon nga nagapakig-angot sa iban pa nga talatapan para mahatagan sang nagakaigo nga pagtamod ang kaso sang sakit nga Filariasis.
Arnold Alarcon Jr.
Capiz Provincial Government News, Capiz News
PROBINSYA SANG CAPIZ – Malipayon nga ginbaton sang 367 ka resipyente sang siyam ka kabanwahanan sa probinsya sang Capiz ang bulig gikan kay Sen. Mar Roxas kag Gov. Victor A. Tanco pinaagi sa Shelter Assistance for Typhoon Frank Victims Program nga ginpatigayon sang damlag lang.
Ang Shelter Assistance Program nga guinpalab-ot sa mga kwalipikado nga benepisaryo pinaagi sa “walo ka panid nga sem para sa atup sang balay, isa ka kilo nga lansang, isa ka pakete nga noodles, sardinas kag bugas,” ini nga bulig nabaton sang 9 ka banwa kasubong sang Ivisan, Sigma, Dao, Sapian, Mambusao, Jamindan, President Roxas, Maayon kag Panitan.
Suno kay Governor Tanco, “makabulig ini sa pagbangon agud ang isa ka pamilya may mapasilungan kag madamo pa nga bulig ang mahimo nga mahatag sang gobierno probinsyal para sa mga Capiznon.”
“Maluwas sa bulig ni Senador Mar Roxas kag sang gobierno probinsyal naghatag man sang P200,000.00 ang probinsya sang Albay, P300,000.00 ang Liga sang mga Gobernador kag P1,000,000.00 gikan sa syudad sang Quezon paagi kay Mayor Sonny Belmonte agud matigayon ang nasambit nga proyekto,” dugang nga pahayag ni Gov. Tanco.
Ang pagpili sang mga benepisaryo sang nasambit nga proyekto ginpangunahan ni Mrs. Violete Silva hepe sang Provincial Social Welfare and Development Office.
Samtang ginpasalamatan sang mga nakabaton ang nasambit nga bulig.
Froilan Unarce
News, Capiz News, Capiz Provincial Government News
