PROBINSYA SANG CAPIZ – Daku ang kalipay sang duha ka Punong Barangay nga sanday Amador Blanco Jr. sang Poblacion Tabuc kag Calix Relano sang Poblacion Ilaya, tanan sakop sang banwa sang Panay sa nabaton nila nga tag P150,000 nga bulig pinansyal gikan sa gobierno probinsyal sang Capiz sadtong Agosto 22, 2008.
Ang nasambit nga kantidad pormal nga gintugyan ni Gov. Victor A. Tanco sa iya talatapan sa kapitolyo probinsyal nga pagagamiton sa sining duha ka barangay sa pagbakal sang duta nga pagapatindugan sang permanente nga barangay hall.
Suno sa pahayag sang duha ka Punong Barangay, nagapangita sila sang duta nga pagapatindugan nila sang nasambit nga edipisyo para sa masulhay kag maayo nga paghatag sang serbisyo sa mga pumoluyo sa nasakupan nila nga barangay.
Sa madumduman, si Blanco kag Relano napili-an nga Punong Barangay sang Oktubre 2007 nga pinili-ay sa barangay kag yara pa lang sa ila nga una nga termino nga pag-serbisyo.
Gindugang pa sa pagpahayag sang duha ka Punong Barangay nga ang nasambit nga kantidad gikan sa talatapan ni Governor Tanco daku ang mabulig para sa pag-umwad sang ila tagsa ka barangay.
FROILAN UNARCE
Capiz News, Capiz Provincial Government News
