Ang Capiz Rehabilitation Center (CRC) nga nahamtang sa Brgy. Lawa-an, Roxas City, may yara na sang nagapamuno bilang Acting Provincial Warden sa persona ni Arjuna Tumlos Yngcong nga nagsugod sa pagpangalagad sadtong tinalikdan nga bulan sang Agosto, 2008.
Si Yngcong nga nagtapos sang Bachelor of Science in Commerce major in Management lamharon, pa sa sini nga palangakuan apang guinahimud-osan niya nga mapakita ang iya ikasangkol sa pag-uyat sa sini nga katungdanan.
Sa pagsugod sang iya pagdumala sa CRC, nagdihon sia sang mga programa para sa ikaayo sang mga priso kag sa pagpatuman sa pagpangalagad.
Una nga iya guinduso ang programa nga naga-sentro sa rehabilitasyon. Guintukod niya subong ang kooperatiba para sa mga priso kag para man sa CRC.
Nagapati sia nga ini nga butang mangin mapuslanon sa mga priso kay mahimo diri matukiban ang ila ikasangkol kag mahanas sila nga mangin produktibo sa katilingban sa ti-on sang ila kahilwayan.
May mga programa man tuhoy sa ikaayong lawas nga iya pagatinguhaan nga matuman sa diin igatukod ang “medical station” sa sulod sang CRC.
Ang problema medical sang bilanggo mahatagan sang pagtamod kag pagtatap sa ti-on nga may magluntad bag-o dal-on sa ospital sang gobierno.
Sa karon, amat-amat niya nga guinapanikasugan ang paghimo nila sang kaugalingon nga barbell kag dumbbells samtang guinahimulatan ang makahingyo sang material kag galamiton sa isports agud makahatag sang kaligaan sa mga priso.
Suno pa gid kay Yngcong, ang mga bakante nga lugar sa palibot sang CRC guinhimulatan nga mangin talamnan sang olotanon kag ini amat-amat na nga nahatagan sang katumanan pinaagi sa “vegetable seeds” gikan sa talatapan sang Provincial Agriculture.
Samtang, ang nagkalatumba nga mga kahoy sadtong paglaslas diri sang bagyo Frank guinhimo nila nga tapi kag guingamit sa pagpa-ubra sa naguba nga kapilya kag ang iban sa pagkaayo sa nawasak nga bahin sang ila balay-prisohan.
Sa gihapon nagapadayon ang paghiwat sang sesyon sa pagtulo-ohan nga guinapatigayon sang nanuhaytuhay nga “religious organizations” agud ang tagsa-tagsa ka binilanggo indi malipat sa tagtuga sang sining kalibutan.
“Kabay nga mahatagan sang katumanan ang mga programa nga gindihon ko para sa mga priso bangud mga tawo man sila nga nagakinahanglan sang rehabilitasyon nga may pag-ulikid,” suno kay Yngcong.
Ramon Atinon
Capiz News: Provincial Government News
Pinalangga nga Attorney Villanueva,
Nabasahan namon ang imo kolum nga SERBISYO LEGAL sa Pag-ulikid: The Official Newsletter of the Provincial Government of Capiz kag nalipay kami nga mga pumoluyo nga makaagum na sang imo LIBRE nga serbisyo legal halin sa imo sensiro nga pagkabalaka labi nag id sa amon nga mga kubos.
Ako ang nagapamuno sa isa ka tumandok nga grupo sang mga pumoluyo nga kon tawgon “Sipag at Tiaga Association” sa sining amon barangay sa diin napilitan kami nga itukod agud mahatagan sang kasulbaran ang nagaluntad diri nga problema.
Ang amon barangay mahimo malab-ot gikan sa pungsodnon nga dalanon pinaagi lamang sa dumaan na nga karsada sang barangay. Guinagamit namon ini nga karsada sa pagdala sang amon mga produkto sa merkado humalin pa sadto sa panahon sang amon katigulangan. Ang mga bumolutho nga kabataan nga nagasakay sa mga traysikol nga nagaagi sini nga dalan sa pagpakadto kag pagpauli gikan sa bulothuan.
Binulan na ang nakaligad, ang anay Punong Barangay namon nga nalutos sadtong nagligad nga pinili-ay sa barangay ang nagsara sa nasambit nga karsada paagi sa pagkudal sang butong kag naga-ambo nga iya guinapanag-iyahan ang bahin sining nahinambitan nga karsada. Walay sapayan, apisar sa paghingyo sang bug-os nga komunidad nga kuha-on ini nga kudal agud maagyan, sa gihapon nagpabilin sia nga matig-a sa pagpamalibad. Sa karon, nagaagi na lang kami sa mga “dikes” kabangdanan nga nabudlayan gid kami sa pagdala sang amon mga produkto sa Poblacion. Nagpangayo na kami sang bulig sa mga opisyal diri sa amon barangay bisan pa sa mga opisyal sang amon munisipyo, apang sa gihapon wala man sang kalubaran ining problema namon. Attorney, ano ang imo mapanugyan sa dapat namon nga buhaton lakip na sa pagabuhaton sang amon mga opisyal sa barangay kag munisipyo?
RSG
Presidente
Sipag at Tiaga
Ginoong RSG,
Una sa tanan, guinapaabot ko sa imo ang akon pagpasalamat sa pagbasa mo sa amon nga Provincial Newsletter. Ini isa lamang ka-pamaagi nga malab-ot kamo sang inyo mga opisyal sang probinsya bisan pa sa nabaw-ing nga barangay. Dugang pa, ang ining LIBRE nga paghatag sang panugyan tuhoy sa kasuguan, isa lamang sa mga proyekto sang aton halangdon nga Gobernador Victor A. Tanco, Sr. sa idalom sang iya programa “Pag-ulikid: Labi sa Tanan ang Tawo.”
Ginoong RSG, ang una nga dapat mo nga buhaton amo ang kadtuan ang inyo Municipal Engineer’s Office kag usisaon sa ila dokumento kon ayhan matuod ang guinapahanungod niya nga karsada isa sa nakilala nga “Barangay Road,” makabig nga amo gid ini, ilabi pa nga suno sa imo ini nga dalan madugay na guinagamit nga alagyan halin pa sa panahon sang imo katigulangan.
Ang bisan sin-o nga naga-angkon sa sini nga dalan sang barangay ukon kabahin lang sini, indi basta sakupon kag ipasara tungod lang sa rason nga sia ang nagapanag-iya, kay sa pagsulondan sang layi, “wala sang sin-o man magbutang sang layi sa iya kamot.” Ang himuon sang naga-angkon amo ang pag-file sang nagakaigo nga akto-legal sa Korte agud mabawi o maagum ang guina-angkon niya nga propiedad.
Sa pagtugot sa bisan kay sin-o nga naga-angkon mag-okupar kag gamiton sa iya gid lamang kaugalingon kag ang pagdumili sa paggamit sang iban, mahimo ini pagatunaan sang pagkinagamo sa diin ini mangin batuk na sa kasoguan.
Sa malip-ot, ang inyo mga opisyal sa barangay, sa pagpakig-angot sa inyo man mga opisyal sa munisipyo kag sa bulig sang PNP, magpakigpulong sa sining naga-angkon kag haylohon sia nga buksan liwat ining “brgy.road” kag kon sa wala sing husto nga rason nga naga-insister gid sia sa sining nabuhat niya nga batuk sa kasoguan, ang nahinambitan nga mga awtoridad sang gobierno mahimo nga kuhaon nila ining naga-upang nga ginbutang sa nasambit nga “Brgy. Road” kag magpasaka sa Korte sang nagaka-igo nga “Criminal and Civil Actions” batok sa sining naga-angkon. Ang “barangay road” nga isa ka pampubliko nga propriedad magapabilin nga magamit sang publiko.
Kon napabay-an ang ginhimo sining naga-angkon nga wala sang tikang sang pagpamatok halin sa gobierno lokal, pareho lang nga ginpasugtan ang iya pagkudal sa nasambit nga dalan nga angkabahin sini guina-angkon nga iya guinapanag-iyahan. Ini isa ka pag-upang sa trapiko kag mahimo pagatunaan sang “crime of grave coercion” kag “malicious mischief.” Ini isa ka maathag kag simpli nga akto kriminal.
Agud iya mapamatud-an ang iya kinamatarung, kinahanglan magpadul-ong sia sa Korte, kag sia pasugtan nga magatiyog ang rueda sang hustisya. Wala sing bisan sin-o nga labaw sa kasugoan. Sa dugang nga detalye, mahimo ikaw makabisita sa opisina ko diri sa Kapitolyo Probinsyal, Syudad sang Roxas.
Salamat sa imo paghatag interes sa pagbasa sa akon kolum.
Capiz News: Provincial Government News, Legal Service
SENADO – Nagpabutyag si Senador Mar Roxas, president e sang Partido Liberal, nga ang pag-suspendir sang Value Added Tax (VAT) sa mga produkto nga gikan sa langis makahatag sa mga konsumidor sang kinahanglanon nga kahaw-asan sa padayon nga pagsinaka sa presyo sang mga nagapanguna nga balaklon sa diin nagnubo sang tinalikdan nga bulan apang nagapabilin sa gihapon ang guinadala nga kabug-at sini sa pumoluyo.
“Indi matarong nga ang mga pumoluyo ang naga-sakripisyo sa karon nga panahon. Indi pwede nga magalaum lang ang gobierno sa pag-kolekta sang husto nga buwis nasandig sa mataas nga presyo sang krudo, gasolina, gas kag asayte,” suno pa sa pahayag sang Senador.
Suno sa pagpanalawsaw, bisan ang krudo sa Dubai nagnubo halin $140 kada bariles sang bulan sang Hunyo kag nangin $116 sang Agosto 13, ini sa guihapon mataas pa sa $70 kada bariles sang nagligad nga tuig kag labi pa sa manubo sa $30 kada bariles sang ang “Expanded Value Added Tax Law” yara pa sa kongreso sang tuig 2004.
Sadtong Agosto 14, ang presyo sang diesel nagabalor sang P55.94 kada litro sa diin P5.99 ang VAT; samtang ang “unleaded gasoline” nagabalor sang P56.96 sa kada litro kag P6.10 ang VAT; kag ang 11-kilogram nga tanke sang LPG nagabalor sang P628.12, may P67.30 nga VAT.
“Ang pangamuyuan naton nga kon tani indi na kita makaagum pa sang dugang nga pagsaka sa presyo sang langis. Apang, bisan indi pa nagsaka ang langis sa pangkalibutanon nga merkado, silot pa sa pumoluyo ang VAT nga dapat gid dulaon,” siling ni Senador Roxas.
Sa liwat, si Roxas nagtawag sang igtalupangod sa Departamento sang Enerhiya nga gamiton ang iya sini poder nga kinahanglan ang mga kompanya sa langis manduan nga buksan ang ila sini libro agud makasiguro nga tama ang guinasukot nila nga presyo.
“Maayo na nga nagapanubo sing diutay ang mga pump prices. Apang dapat siguraduhon sang gobierno nga wala kita guinapanghimuslan sang mga higante nga kompanya sang langis,” ginpahayag pa sang Senador.
Si Roxas nagpasar sang hagna sa Senado nga may numero 1962 nga suspendihon ang VAT sa mga oil products sa sulod sang anum ka bulan. Bisan konserbatibo ini, sa gihapon guinaduso gid ni Roxas ang pagsuspendir sang VAT sa oil bilang temporaryo nga kahaw-asan sa mga konsumidor nga nagkarga sang kabug-atan sa padayon nga pagsinaka sang nagapanguna nga mga balaklon kag produkto halin sa oil.
Ang Capiznon nga Senador padayon nga guina-suportahan sang mga kubos nga pumoluyo sa iya sini kampanya para zero VAT oil. Sining karon lamang, nagpakigpulong sia sa mga katapo kag lideres sang Pinagkaisang Samahan ng mga Tsuper at Operators Nationwide (PISTON).
“Ang mga driver mismo ang nagpahayag nga pierdi gid sila katama tuga sang VAT, maluwas pa sa mataas na nga presyo sang langis. Indi ang mga manggaranon ang naga-reklamo. Nga-a importante sa gobierno ang paantuson ang pumoluyo kay sa buhinan ang kaimulon?” pamangkot ni Sen. Mar Roxas.
Capiz News: Mar Roxas News
PROBINSYA SANG CAPIZ – Sa katuyuan nga maamligan ang kinamatarong sang mga kabataan ginpatigayon ang 2008 Provincial Summit for Children sa Nestas Hilltop diri sa syudad sang Roxas sa pagpanikasog sang Provincial Planning Development Office (PPDO-Capiz), Integrated Provincial Health Office (IPHO-Capiz) kag United Nations Children’s Fund (UNICEF).
Ini nga kahiwatan ginpasakupan sang pila sang mga ahensya sang gobierno kag subong man ang pribado nga sektor sa diin gintalakay ang pagpasangkad sang programa sa pag-amlig sang kabataan nga ginpatigayon naman sang pila ka local government units lakip ang partners sini gikan sa pribado nga sektor.
Dugang diri ginhatagan sang pagtamod ang bahin sa “Awareness of Sanitation and Hygience” sa ikaayo sang kabataan, ang programa nga suportado sang UNICEF, World Health Organization, Water Supply and Sanitation Collaborative Council kag Non-Government Organizations.
Gin presenter man sang nahinambitan nga kahiwatan ang may kaangtanan sa “2007 Capiz Multiple Indicator Cluster Survey (MICS) and Accomplishments.”
Samtang, ginpasayod naman ang Executive – Legislative Agenda for Children ni Board Member Esteban Evan B. Contreras II nga amo naman ang vice chairman kag action officer sang komitiba sa kabataan sa kabata-an kag kababainhan. Ang pagpirma sang “Manifesto of Support for the Welfare of Children” nga gin-suportahan sang mgan tagpumalasakop.
Ginpatigayon ni Board Member Nenita Martelino nga amo naman ang chairman sang komitiba sa kababainhan kag pamilya.
Samtang ang mensahe ni Gov. Victor A. Tanco may kaangtanan sa sini nga kahiwatan ginbasa ni Board Member Vincent Fritz Cruz-am, nga amo ang tiglawas sang gobernador.
FROILAN UNARCE
Capiz News: Capiz Provincial News
PROBINSYA SANG CAPIZ – Naghagan-hagan ang kalisud nga nabatyagan sang 21 ka pamilya nga nalisdan sang mabaton nila ang tag P10,000 nga bulig pinansyal sang damlag lang gikan sa gobierno probinsyal sang magragasras ang bagyo Frank sa Capiz sadtong bulan sang Hunyo, sining tuig. Sa isa ka malip-ot kag emosyonal nga programa nga ginhiwat sa Holding Room sang Kapitolyo Probinsyal, ang pagpanagtag sang tag P10,000 nga bulig pinansyal ginpangunahan ni Gov. Victor A. Tanco, PSWD Officer Violeta Silva, Action Officer Arnold Talabucon sang Provincial Disaster Coordinating Council. Suno sa mensahe ni Gov. Victor A. Tanco, “ang Capizeño isa ka pamilya nga may pagbinuligay sa ti-on nga guina-agyan sang kasubong nga kalamidad kag ang gobierno probinsyal wala nagapabaya sa paghatag sang masarangan nga bulig sa diin magluwas sini ang masunod nga programa amo naman ang matatap sa iban nga nahalitan ilabi na yadtong mga kubos nga mabuligan nga mabutangan sang bubong ang ila puloy-an nga naguba sadto sang bagyo Frank.” Ang mga biktima nga nagkalamatay dulot sang bagyo Frank, ang sanday Cordeliza de los Reyes Mackmaw sang brgy. Olotayan, John Lloyd Galleno sang brgy. Milibili kag Magno Aguirre sang brgy. Barra, tanan nga taga syudad sang Roxas; Jordan Paul Florino sang brgy. Nasunugan, Gilbert Ombid sang brgy. Daplas, Reynold Simpino sang Malonoy, mag-ulutod nga Jovin kag Jovan Biñas sang Balucuan kag Marilou Ebacuado, tanan sang banwa sang Dao; Liza Vigo sang brgy. Baye-Baye, Jamindan; Rosie Hilan sang brgy. Anhawon, Panay; Marvin Barquilla sang brgy. Amaga, Cheryl Casimiro kag Carlito Azores sang brgy. Mangoso, tanan sang banwa sang Sigma; Irish Gautani sang banwa sang President Roxas; Dulsura Francisco sang Cabugao kag Alfredo Dadivas, parehas nga taga banwa sang Panitan; Roberto Bacay brgy. San Nicolas, Pilar; Riggs John Beatriz sang brgy. Malag-it, Pontevedra kag Ernesto Panes sang brgy. Sto. Niño, Dumalag, tanan pumoluyo sang probinsya sang Capiz. Nangin masinolub-on kag ang iban nagatalangison nga nalisdan nga pamilya samtang guinabaton ang bulig pinansyal. Suno kay Concepcion Bilan sang Anhawon, Panay, himata sang biktima nga si Rosie Bilan Hisula, “daku ang mabulig sini sa amon pinansyal nga kinahanglanon kag pagpangabuhi.” Sarah Obidos kag Ramon Atinon Capiz News: Capiz Provincial Government News
TAPAZ, CAPIZ – Malipayon ang mga pumoluyo sang pormal nga gin-inagurahan ang “foot trail” ukon latayan sa barangay Daan Sur, Tapaz, Capiz sadtong Agosto 28, 2008.
Ang nasambit nga proyekto daku ang mabulig para sa masulhay nga panglakaton sang mga pumoluyo nga naga-angot sa sentro sang Daan Sur kag brgy. Roxas Otso kag iban pa nga kaingod nga kabaranggayan.
Suno sa pahayag ni Punong Barangay Renante Gardose sang Daan Sur, “daku gid ang pagpasalamat sang mga pumoluyo nga ginhatagan pondo ni Gov. Victor Tanco ang amon ginhingyo nga proyekto.”
Ginpahayag man ni Governor Tanco, “ang kalabanan nga guinapangayo sang kabaranggayan sa Tapaz ang kasubong sini nga proyekto bangud makabulig ini nga mangin mahapos ang ila pagdala sang produkto padulong sa merkado sang banwa.”
“Ang nasambit nga pondo sang proyekto ginkuha sa 20-porsiyento sang development fund sang gobierno probinsyal agud makabulig sa pagpaumwad sang aton kabaranggayan,” dugang nga pahayag ni Gov. Tanco.
Froilan Unarce
Capiz News: Capiz Provincial Government News
Sa tagsa ka tawo nga magpadulong sa kapitolyo probinsyal, una nga guinapangita ang talatapan ni Governor Vic Tanco agud mangayo sang trabaho, proyekto kag bulig.
Suno sa ginsaad ni Governor Vic sa pumoluyo nga ang iya “Pag-ulikid: Labi sa tanan ang Tawo,” isa ka krusada nga masami mabatyagan ang iya paghigugma kag pagkabalaka sa mga Capiznon kag sa probinsya nga madugay na niya guina-amligan kag guina-serbisyuhan, kag ang ini nga tinaga indi lang magapabilin nga isa ka promisa sa palamatin-an sang pumoluyo.
Sa iya masobra sa isa ka tuig nga pagpangalagad bilang Gobernador sang probinsya sang Capiz, ginhimulatan niya nga mahatagan sang katumanan ang iya gindihon nga programa para sa kauswagan sang Capiznon.
Sa iya una nga bulan sang pagpangalagad bilang ika-20 nga Gobernador sang Capiz, ginpasakaan niya ang sweldo sang mga empleyado sa kapitolyo kag guin-aprobahan ang 88 ka aplikante para sa permanente nga posisyon sa gobierno nga wala sang kon ano man nga kondisyon sa politika.
Ang iya paghimud-os nga ma-amligan ang kultura kag labi nga mapasanyog ang turismo agud mangin sentro ang probinsya sa pagbisita sang mga lokal kag gikan sa iban nga pungsod nga mga turista, ini amat-amat na nga nadiparahan sa Nakatungdan nga Bisayas pinaagi sa pagduso sang Provincial Tourism Office.
Ang iya padayon nga pag-ulikid sa inprastraktura agud mapakay-o ang mga nagkalaguba nga karsada, eskwelahan kag edipisyo sang probinsya kag pagdugang sang pondo para sa proyekto sa mga kabanwahanan kag kabaranggayan nga labi nga nagakinahanglan sang suporta sang probinsya para sa tayuyon nga progreso sang komunidad.
Ang wala untat nga misyon medikal sa kabaranggayan kag kabanwahanan agud padayon nga ma-amligan ang ikaayong lawas sang mga Capiznon para mangin mapagros kag produktibo nga pumoluyo.
Bilang produkto sang guina-respeto kag prestihiyuso nga Unibersidad sang Pilipinas, gintinguhaan niya nga mahatagan sang libre nga edukasyon sa kolehiyo ang mga imol apang may ikasangkol nga estudyante nga nagahandum nga mangin isa ka professional kag madason nga haligi sang aton komunidad pinaagi sa programa nga VIC Scholarship, ika nga…“Iskolar ng Capiz.”
Una ko nga nakilala si Governor Vic sang siya Bise-Gobernador pa lang kag nagsugod ang amon pag-abyanay bangud sa isports.
Kon matandaan pa ninyo nga si Gov. Vic Tanco isa sa mga lider nga mahiligon sa isports. Siya ang pinakauna nga Gobernador nga naghatag sang kahigayunan nga makalantaw ang Capiznon sang libre nga away ni Filipino ring icon Manny Pacquiao kontra American-Mexican boxer David Diaz para sa 135 pounds WBC Lightweight Championship Fight live via satellite sa nag-ginulutok nga tumalan-aw sa Capiz Gymnasium sadtong Hunyo 29, 2008.
Sa apat na ka hampang nga ginpatigayon sang Philippine Basketball Association (PBA) sa Capiz Gym, wala ini mapuno kasubong sang away ni Pacquiao kag Diaz nga suno sa tawo kon nagkampeon man si Pacquiao sa WBC Lightweight Division, si Governor Tanco man gihapon ang ila kampeon bangud siya ang naghatag sang kahigayunan nga makalantaw sila sang nasambit nga boksing.
Ang “Pag-ulikid,” isa sa ka dungganon nga tinaga, napun-an sang pagpalangga kag sa iya paghatag sang importansya nga “Labi sa tanan ang Tawo,” naghatag sang matuod-tuod nga dagway sang makatawo nga panghimanwa.
Ang krusada ni Governor Tanco, may aksyon kag tagipuson nga upod kag ini ginpabatyag niya sang lubos sa Capiznon sang dalasa-on sang bagyo Frank ang aton probinsya.
Para kay Governor Vic Tanco, ginpili siya sang pumoluyo para mag-serbisyo kag magbulig sa pagpatin-ad sang aton probinsya bangud ini ang iya mandatos gikan sa Capiznon nga lubos ang pagsalig sa iya ikasangkol kag liderato padulong sa isa ka mainuswagon nga komunidad.
Ang Kapitolyo indi lang talatapan ni Governor Tanco bangud para sa iya, ini ang edipisyo sang Capiznon nga bukas para sa tanan agud mapangalagaran ang pumoluyo nga nagasalig sa iya.
Kon si Victor A. Tanco ang Gobernador sa karon bangud kay ginpili sia sang mga tawo para sa isa ka tawhanon nga panghimanwa nga may “Pag-ulikid: Labi sa tanan ang Tawo.”
Editoryal ni Edward Basilonia
Refrain:
Pag-ulikid dungganon nga tinaga
Tinaga sang pagpalangga
Sang tinuga nga nagatuo
Labi sa tanan, Ang tawo
I
Pag-ulikid sa tawhanon nga kultura
Nagalaragway sang kawsa sang masa
Ini ang mangin sandigan nga programa
Turismo pangapinan ang ekolohiya
II
Pag-ulikid sa inprastraktura
Guinahalad sa pumoluyo ang pag-asa
Igatib-ong abanse nga ekonomiya
Agud maangkon kadalag-an sang banwa
Refrain:
Pag-ulikid dungganon nga tinaga
Tinaga sang pagpalangga
Sang Gobierno nga nagatuo
Nga Labi sa tanan ang Tawo
III
Ikaayong lawas kag edukasyon
Nagapangibabaw sa iya tagipusuon
Pang-agrikultura, iya guinatigayon
Governor Victor Tanco, para sa mga Kapisnon
Refrain:
Pag-ulikid, dungganon nga tinaga
Tinaga sang pagpalangga
Sang tinuga nga nagatuo
Nga Labi sa tanan ang Tawo….
Governor Victor Tanco nga nagatuo
Nga Labi sa tanan ang Tawo…
Nga Labi sa tanan ang Tawo
JOHN S. HEREDIA
Composer
PROBINSYA SANG CAPIZ - Bilang pagpakita sang kaugalingon nga pag-ulikid sini, wala sing pagpangduhaduha nga nagpalab-ot sang bulig pinansyal sa gobierno probinsyal sang Capiz ang Federation of Filipino-Chinese Chambers of Commerce and Industry, Inc. para sa mga biktima sang bagyo “Frank” sa probinsya.
Mainit nga ginbaton ni Governor Victor A. Tanco dala ang pagpasalamat, sang nasambit nga bulig nga ginpaagi sang pederasyon sa Capiz Halaran Chamber of Commerce and Industry, Inc.(CHCCII) kag Roxas City Filipino-Chinese Chamber of Commerce and Industry, Inc.(RCFCCCII).
Ang tseke para sa bulig pinansyal ginhatag ni Jose Neri Ong, presidente sang CHCCII, kag Leny Albert Apaitan, presidente sang RCFCCCII, kay Gobernador Tanco sa ti-on sang isa ka simple nga seremonya nga ginpatigayon sa talatapan sang Gobernador pagkatapos sang bagyo.
Ang seremonya gisaksihan sang mga katapo sang duha ka mga chamber, mga opisyal sang gobierno probinsyal, kag mga miembro sang lokal nga media.
Sa madumduman, ang bagyo “Frank” nag-igo kag nagtuga sang kahalitan sa probinsya kag syudad sang tinalikdan nga Hunyo 21, 2008.
Ang pungsodnon nga pederasyon sang mga negosyante nga Filipino-Chinese maga-donar man sang pito ka bag-o nga mga school building nga may tag-duha ka mga hulot-klasehan sa probinsya nga nagabili sing P2.8 milyones.
Sa bahin sang Capiznon nga mga chamber, nangin aktibo ini sila sa pagbulig nga mapasanyog ang turismo sa probinsya kag syudad paagi sa pagpatigayon sang kaangot nga mga proyekto.
Kalakip diri ang pagpatigayon sang guinatawag “day tour” sang nagapanguna nga mga turismo nga sarang mapadulungan sang mga dumuloong sa mga kabanwahan kag syudad sang probinsya.
JAMES CABAG/PIA
Capiz News: Capiz Provincial Government News
Si Governor Victor Arancillo Tanco ang isa mga lider sang Capiznon nga malapit sa tawo kalakip sang iya mga gindihon nga programa agud mapasanyog ang ekonomiya, ikaayong lawas, turismo, edukasyon kag inprastraktura para sa mainuswagon nga probinsya.
Sa pagpangalagad sa komunidad nagakinahanglan sang sensiridad kag paghigugma sa tawo kag dunang manggad.
Nakahibalo kita, nga indi madali ang mangin lider sang tawo apang kon ang imo pagkatawo guinahigugma sang imo isigkatawo mangin mahapos ang tanan sa pagserbisyo.
Ang krusada ni Governor Tanco ang “Pag-ulikid: Labi sa tanan ang Tawo,” naghatag sang daku nga pagsalig sa mga pumoluyo nga malab-ot sila sa pagpangalagad.
Sa tagsa ka yara sia sa iya talatapan, si Gov. Vic Tanco ang nagagwa sa iya opisina sang masobra sa alas 12:00 sa udto, maalagaran lang ang mga pumoluyo nga nagakinahanglan sang bulig sang gobierno probinsyal. Maski sa puloy-an sang gobernador wala niya guinatalikdan ang mga tawo nga nagapakig-angot sa iya agud mangayo sang bulig kag proyekto bangud suno kay Governor Tanco ang mga pumoluyo ang kabangdanan kon ngaman padayon sia nga nagapangalagad sa probinsya sang Capiz.
Ano man nga kalamidad, hilikuton opisyal kag personal, ano man ini ka gamay kag ka daku basta wala lang sang malain nga sablag sa iya lawas wala nagapamalibad si Gov. Vic Tanco sa pagpakig-upod.
Gintuman man ni Governor Tanco ang iya handum nga mahatagan sang nagakaigo nga impormasyon ang mga Capiznon pinaagi sa pagdul-ong sang nagapanguna nga balita gikan sa apat ka pamusod sang kapitolyo kag gobierno probinsyal pinaagi sa radio block time program sa RMN-dyVR kag dyOW-Bombo Radyo; news reports sa Budyong Kapehan (Wesfardell Cable TV channel 6), Abri-Aga kag Arangkada sa Alto Cable TV sa channel 5; kag ang opisyal nga pamantalaan sang gobierno probinsyal nga nagabalhag sang aktibidades agud mangin dokumentado ang tagsa ka hilikuton.
Governor Victor A. Tanco, ang imo krusada “Pag-ulikid: Labi sa tanan ang Tawo,” mangin salandigan sang pumoluyo para sa tawhanon kag tampad nga pagpangalagad.
