Capiz Provincial Government News: Programa sa impormasyon ginpasangkad ni Gov. Tanco

PROBINSYA SANG CAPIZ – Dugang pa gid nga ginpamatud-an ni Governor Victor A. Tanco ang iya krusada nga “Pag-ulikid: Labi sa tanan ang Tawo” pinaagi sa paglunsyar sang opisyal nga pamantalaan sang gobierno probinsyal sang Capiz sang nagligad nga Agosto 12.

            Ang Hiligaynon nga balasahon nga ginpangalanan sa krusada sang gobernador ang magatamud sa pagkinahanglan sang mga Capizeños sa impormasyon ilabi na sa mga proyekto kag programa sang probinsya.

            Ginpahayag ni Edward Basilonia nga amo ang hepe sang Capiz Provincial Press Bureau (CPPB) kag Editor-in-Chief sang bulanan nga pamantalaan nga ang balasahon ang dugang sa Pag-ulikid nga programa sa radyo sang probinsya sa katuyuan nga mangin hayag sa mga pumoluyo ang administrasyon ni Governor Tanco.

            Ang walo ka panid nga newsletter ang guinalakipan man sang mga column, guinapabugal ka sang mga Capiznon, turismo, subong man update kay Senador Mar Roxas kag mga litrato magluwas sa mga balita nga sinulatan sang CPPB staff, mga empleyado sang Kapitolyo kag amot nga balita sang mga katapo sang media.

            Samtang ang paglunsar sang pamantalaan nga Pag-ulikid ang kadungan sa paglunsyar man ni Gobernador Tanco sang iya opisyal nga kanta nga ginpangalan sa iya krusada kag ang gindapat sini nga mga tinaga ang ginsulat ni John S. Heredia, isa man ka katapo sang media diri sa probinsya sang Capiz. “Pag-ulikid amo ini ang interpretasyon sang serbisyo publiko,” ang pahayag ni Governor Tanco sa English nga mga tinaga sa ginpatigayon  nga malip-ot nga seremonya sang paglunsyar sang pamantalaan kag kanta.

            Nahibaluan nga masobra na sa isa ka tuig nga nagapangalagad ang programa sa radyo nga guinadumalahan sang CPPB ang Pag-ulikid: Labi sa tanan ang Tawo, kag ini inyo mabati-an 8:30 tubtob 9:00 ang takna sa aga kada Miyerlukes sa dyOW-Bombo Radyo kag 8:00 tubtob 9:00 ang takna sa aga kada Biyernes sa RMN-dyVR kag ini inyo mabati-an ang mga pagbayluhanay sang ideya sang host nga si Allen Hervias kag sang iya co-host nga si Edmund de Asis kag mga nagapanguna nga balita sa gobierno probinsyal nga guinadul-ong ni Froilan Unarce.

            Samtang sang Agosto 15, pormal na nga nagsugod sa telebisyon ang matag-adlaw nga pagdul-ong sang mga balita pinaagi sa programa Budyong Kapehan sa channel 6 sa Wesfardell Cable TV kag Abri-Aga sa channel 5 sa Alto Cable TV.

            Dugang diri, padayon nga guina-mentinar ni Domingo “Bong” Noval Jr. sang GIS ang Website sang probinsya kag ini sarang ninyo makit-an sa www.capiz.gov.ph

            Sa karon may apat na ka alagyan sang impormasyon ang lokal nga pangulohan sang Capiz pinaagi sa radyo, telebisyon, pamantalaan kag website sa tinutuyo nga malab-ot kag ma-serbisyuhan para sa ihibalo sang mga Capizeño.   

(ALEX LUMAQUE/PIA-Capiz)

Capiz News, Capiz Provincial Government News