SIGMA, CAPIZ – Madinalag-on ang inagurasyon sang bag-o nga ginpatindog nga Day Care Center nga ginpatigayon sa Sitio Katamnan, barangay Pari-an, Sigma, Capiz sang tinalikdan nga Agosto 28, 2008.
Ang nasambit nga proyekto natigayon sa pagbinuligay nanday Senador Mar Roxas, Gov. Victor A. Tanco, Mayor Mary T. Andaya kag Punong Barangay Melvin Caporal, ini kabahin sang ila gintingub nga programa para sa edukasyon sang mga kabataan.
“Mas kinahanglanon sang mga kabataan ang ini nga proyekto agud mangin responsabli kag produktibo sila sa aton sosyodad pag-abot sang tama nga panahon. Kag mas labi nga madinalag-on kon ang barangay, banwa kag probinsya nagabinuligay sa pag-implementar sang proyekto kay ang pumoluyo ang maka-benepisyo,” ginpahayag ni Governor Tanco.
Suno kay Punong Barangay Caporal, “tumalagsahon ang ini nga oportunidad nga mahatagan ang isa ka barangay sang kasubong sini nga proyekto.”
Capiz News, Capiz Provincial Goverment News
PROBINSYA SANG CAPIZ – Ang gobierno probinsyal sang Capiz naghatag sang P1-milyon nga bulig pinansyal sa banwa sang Maayon pinaagi sa Crop Loan Assistance (CLA) para sa mga mangunguma sang mais sa nasambit nga banwa sadtong Agosto 22, sining tuig.
Ang nasambit nga kantidad pinaagi sa tseke ang pormal nga ginhatag ni Gov. Victor A. Tanco kay Mayor Belegio Dueñas ang Maayon sa presensya ni konsehal Maximo Orendez kag sang mga katapo sang media sa talatapan sang gobernador.
Ginpahayag ni Mayor Dueñas nga ang CLA maga-serbi nga “soft loan” sa masyado kanubo nga interest rate kag magluwas sini ang lokal nga pangulohan sang Maayon nagpa-in man sang isa ka milyon ka pesos bilang kabahin sang sini nga proyekto.
“Kapin sa 200 ka mangunguma sang mais ang maka-benepisyo sini bilang kabahin sang rehabilitasyon sa nahalitan nila nga talamnan sang mais sang maglaslas ang bagyo Frank sa probinsya sang Capiz,” dugang nga pahayag ni Mayor Dueñas.
Sang damlag lang, nagbisita si Agriculture Secretary Arthur Yap sa probinsya sang Capiz kag nagpatigayon sang sinapol kaupod si Governor Tanco lakip ang pila ka mangunguma agud hibaluon kon ano nga sahi sang bulig ang sarang nga mahatag sang natungdan nga ahensya sang gobierno para sa Capiz nga isa sa mga probinsya nga guinakabig nga naga-panguna nga manugpatubas sang humay kag mais sa pungsod Pilipinas.
(FROILAN UNARCE)
Capiz News, Capiz Provincial Goverment News
